Vawiin atang hian Serchhip District ah Measle - Rubella Vaccine beihpui thlakna kalpui tan niin a hawnna hun Chawngbuangi Memorial School ah neih a ni a, Addl DC Pu Chuauhnuna, MCS chu khuallian niin he Campaign hi a hawng.

A hawnna inkhawm tawi Pu Laldawngliana Chief Medical Officer kaihhruaiah hian Pu Chuauhnuna Addl. DC chuan Vaccine lak  a hlauhawm loh dan te, Vaccine lak that loh avanga hriselna kawngah  buaina leh harsatna tamtak kan tawh leh thin thute, hrisellohna avanga sum tam tak kan sen ral thin thute a sawiin, he vaccine hi Serchhip District chhunga a la tur naupangte chuan kim taka lo la ngei turin a ngen a ni. HE hunah hian Dr Lalhlunpuii District Immunization Officer chuan hmalak dan tur ruahmanna tlangpuite sawiin lawmthu sawina hun a hmang bawk. A hawnna hun tawi hman zawh hian he School a naupangte hnenah hian vaccine pe tura din team ten vaccine pekna an nei zui nghal a. An ni ang bawk hian Serchhip khaw chhunga School hrang hrangah te, District chhung khaw hrang hranga zirna inah te team hrang hrang ten vaccine pek hna hi an tan nghal a ni.

He beihpui thlak, nikum lam atanga inbuatsaihna kalpui tan tawh hi Serchhip ah chuan Hapta nga (5) chhung kalpui tur niin vaccine la tur naupang thla kua (9) atanga kum sawmpanga (15) chin te hnenah pek tur a ni a. A dawngtur kum bithliah te hian  kim taka an lak ngei theih nan khawtlang hruaitute, tlawmngaipawlte, sawrkar Department hrang hrangte leh zirlai nu leh pa te phungbawm a sawm an nih bakah kohhran (Biakin) tina chhiarchhuah tur lehkhate buatsaih a ni.  Vaccine pek hun chhung hian a tam thei ang ber an khaw/Veng bil Information Mike a puan thin a ni bawk ang. Tin, khaw tinin Vaccine Supervisor an neih kim theih nan Health Department lama thawktute indaihlohna phuhruk dan ruahmanna siamin  transportation plan pawh  siamfel a ni bawk.

India ramah M-R Vaccine pek beihpui thlak hi kalpui mek niin tun thleng hian State 15 a naupang thla kua leh kum 15 inkar chin mi 8 crore pek tawh an ni a. Mizoramah April ni 16 atanga khan  hapta nga (kar 5) chhung beihpui hi thlak zui tur niin, hapta hmasa pahnih hi zirna in hrang hranga naupangte pek nan hman a ni anga, a dawtah Anganwadi a naupang inziak lutte hnenah pek leh tur niin a dawt lehah zirna ina kal tawh lo, kum 15 leh a hnuai lam chin  vaccine la dawng lo te zawn chhuahna neih zui zel tur a ni dawn a ni.