Vawiin khan Lawngtlai Chandmary Venga Ngurnunsangi English School-ah National Deworming Day (NDD) hman niin, August thla chhunga naupangte hnena rulhut hlo pek runpui neih tur chu Lawngtlai District tan Lawngtlai Chief Medical Officer (CMO) Dr Lalthlamuana chuan a hawng.

Dr Lalthlamuana chuan naupangte rulhut pai lo tura inven a pawimawh thu sawiin, pheikhawk bun lo chuan pawnah leh inthiarnaa kal te a him lo a ti a. Ei tur, thei leh thlai reng reng ei hmaa sil fai zel leh inthiar zawha fai taka kut sil te hian rulhut lakah min veng thei a ni, a ti a. Zirlai naupangin rulhut a pai chuan a rilru a chak lo zual thei a, zawi ngawih ngawihna te a thlen a, harsatna chi hrang hrang a nei thei a ni tiin, rulhut laka him turin kan nun kan vawn fimkhur a ngai a ni, a ti bawk.

He hun hi National Health Mission (NHM) Lawngtlai District-a District Programme Manager Pi Lalkhawngaihdawngi Chinzah chuan kaihruaiin, Lawngtlai District Immunisation Officer Dr S. Thaizi chuan National Deworming Day chu kum tin vawi hnih, January leh August thlaah hman thin a nih thu leh naupang kum 1-19 inkar hnenah rulhut hlo, Albendazole Tablet a thlawna pek thin a nih thu te a sawi a. Zirlai naupangte chu rulhlut hlo eitir nghal an ni a. RKSK Co-Ordinator Pi Lalduhawmi Tlau chuan lawm thu sawiin, hun khar a ni.

Tun tum NDD-ah hian rulhut hlo hi sikul hrang hrangah zirlaite pek an ni ang a, sikul la kal lote chu Anganwadi Centre hrang hrangah pek an ni thung ang a. Vawiin August ni 8-a ei hman lo tan August ni 16 hian ei theihna hun buatsaih leh a ni bawk ang.