Vawiin khan Lawngtlai District Task Force Immunisation (DTFI) chu an Chairman, Lawngtlai Bawrhsap Pi Shashanka Ala, IAS hovin a office chamber-ah an thu khawm a. National Immunisation Day 2019 hman dan tur an rel.

National Immunisation Day (NID) hi March ni 12, 2019 hian hman tur niin, naupang kum 5 hnuai lam zawng zawng chu zenghri danna (oral polio vaccine) pek vek tur a ni a. Hemi atan hian Lawngtlai District target chu naupang 14693 an ni.

NID hawnna hi Lawngtlai Electric Veng Anganwadi Centre-ah zing dar 9-ah buatsaih a ni ang a. Hemi ni hian zenghri danna hi a pekna tur booth siamah health department leh anganwadi-a thawktute'n an pe ang a. Heta kal thei lo an awm chuan a tukah an ina kal chilhin hri danna hi an pe bawk ang.

Lawngtlai District chhungah hian booth 196 a awm dawn a. Lawngtlai main centre huam chhungah Areopagy bakah, sub-centre, anganwadi centre leh sumo counter thenkhatah te booth 33 buatsaih a ni dawn a ni.

Vawiina DTFI thu khawm chuan NID-a booth level leh home visit-a ti tha zual anganwadi worker pathum hnenah lawmman (cash incentive) pek an rel a. Hri danna la thei zawng zawngin an lak vek theih nan village council leh kohhran hrang hrangte chu puanzarsak tura ngen ni se, tih a ni bawk.