Vawiin tlai khan Economics & Statistics Conference Hall, Khatlaah Ministry of Commerce & Industry hnuaia Department for Promotion of Industry and Internal Trade leh Planning & Programme Implementation Department hnuaia Entrepreneurship Development Scheme (EDS) Cell tangkawp buatsaih ‘Startup India Mizoram Yatra’ kharna leh hemi hnuaia Business Plan Competition result puanna hun neih a ni a. Labour, Employment, Skill Development & Entrepreneurship Department (LESD&ED) Minister Pu Lalchhandama Ralte chu Khuallian niin a hmanpui.

Minister chuan thalai zingah mahni kutkawiha dinchhuah tum, talent tipunga taima taka ngaihtuahna seng an tam chho zel chu lawmawm a tih thu a sawi a. Ram puma entrepreneur tha tak tak intawhkhawmna hun buatsaih a ni chu lawmawm a tih thu a sawi a. India ram hi entrepreneurship lamah kan harh thar nasa a, LESD&ED chuan hmachhawp tam tak a neih zingah entrepreneurship lama sawrkar laipui hmalakna pakhat Skills Acquisition and Knowledge Awareness for Livelihood Promotion (SANKALP) kalpui turin ruahmanna siam a ni, a ti a. Thalai lehkha thiam kan tam chho zel a, sawrkar hnain min daih vek dawn lova, mahni kut kea din a tul telh telh a ni, a ti a. Mahni thiamna (skills) hmanga thalaiten ke an pen theih nan sawrkar pawh a inhawng a ni, a ti a. Development scheme tam takah mahni thiamna tihpun tum lo, sawrkarin hamthatna a pek nghak ringawt kan tam hle a ni tiin hei hi hmasawnna daltu pakhat a ni, a ti a. Entrepreneurship hi hmasawnna khawlpui anga sawi thin a ni tiin hemi lama harh thar zel turin kalkhawmte chu a fuih a. Entrepreneurship chawikang zel turin LESD&ED leh Planning Department ten thawhhona tha tak an neih chhunzawm zel a beisei thu a sawi bawk a ni.

Startup Yatra hian a tum ber chu entrepreneurship lama inhrilhhriatna pek a ni a, hei bakah hian hetiang lama tuite tan competition hmanga hmasawn thei tura chher chhuah a tum bawk a ni. Startup India Mizoram Yatra hi thla hmasa ni 25 khan hman tan niin Minister of State Pu TJ Lalnuntluanga chuan Yatra Van a vailiam a. Startup India Mizoram Yatra hi chhawng hniha kalpui a ni a, Yatra Van Stop programme neih niin Boot Camp in a zui a ni. Govt. J Thankima College leh Synod Higher Secondary School-ah Van Stop neih nghal a ni a. February Ni 22 khan Govt. Kolasib College ah pawh Van Stop neih tawh a ni a, Govt Champhai College ah February Ni 26 ah kalin, Lunglei Govt. College ah February Ni 27 khan programme neih a ni leh a. Van Stop programme-a tel zat hi : Govt. Kolasib College-72, Govt. J. Thankima College-94, Synod Higher Secondary School-20, Govt. Champhai College-47, Lunglei Govt. College-102 an ni.

February Ni 27 leh Ni 28 khan Aijal Club leh Lunglei Convention Centre-ah Boot Camp neih a ni. Boot Camp-ah hian zirtirtute hnenah entrepreneurship chungchang training pek an ni a, entrepreneurship cell din leh kalpui dan sawi ho a ni. Business Plan Competition atan mi tam tak an inziaklut a, anni hi Ideation Workshop neihpui an ni a. Zirlaite nen mahni kut kea din theihna atan inkawmna hun neih a ni bawk. Aizawl Boot Camp-ah hian mi 86 inziaklutin Business Plan Competition-a tel mi 45 zingah mi 26 in  final an lut a.  Lunglei Boot Camp-ah hian mi 185 inziaklutin Business Plan Competition a tel mi 14 zingah mi 7 in final an lut a ni.

Programme hi Planning Secretary Dr. C. Vanlalramsanga chuan kaihruaiin kalkhawmte lawmna thu a sawi a. Khuallian chuan lawmman semna hun hmangin certificate a hlan a. Planning Department hnathawk te, Business Plan Competition finalist te, Startup India aiawha lokal te, MEDMOC member te an tel a ni.  

Startup India Mizoram Yatra hnuaia lawmman dawngtute chu:

Startup Hero of the State: Rs.1 lakh – Mangdingluaia

Most innovative idea - Agriculture:

1^st (Rs.70,000)-Francis Sailo

2^nd (Rs.50,000)-Melvyn Vanlalhlimpuia

3^rd (Rs.30,000)-Ramdinmawia

Most innovative idea - Technology:

1^st (Rs.70,000)- HV Lalzuimawia

2^nd (Rs.50,000)-K Lalrinawma

3^rd (Rs.30,000)-KC Lalhmingmawia

Most innovative idea - Social:

1^st (Rs.70,000)- Lalhlupuii Ralte

2^nd (Rs.50,000)-Zosangzeli Chhakchhuak

3^rd (Rs.30,000)-Patricia Zadeng

Top women entrepreneur:

1^st (Rs.70,000)-Lalrinkimi

2^nd (Rs.50,000)-Lalhmachhuani

3^rd  (Rs.30,000)-K Thanzami