3367/2022-2023

Pawlkut thla ni 25, 2023: Vawiin khan National Voters' Day (NVD) vawi 13-na chu Lawngtlai DC Conference Hall-ah District Election Officer, Lawngtlai Bawrhsap Pu Amol Srivastava hovin hman a ni.

Pu Amol Srivastava chuan India ram chu mipui rorelna (democracy) ram niin, voter-te chu democracy innghahna leh chawi nungtu ber an ni, a ti a. NVD chu voter-te pawimawhna inzirtirna leh, inthlan kaihhnawiha hna thawk ṭhate hna thawh tar lanna leh chawimawina ni atan hman ṭhin a ni tiin, NVD 2023 puala Lawngtlai District-a chawimawina dawngtute chu chhuanawm a tih thu leh a lawmpui thu a sawi a. Election-a thawktute thawhrimna leh political party leh media-te thawhpuinaah lawm thu sawiin, inthlan kum a nih angin theih tawp chhuah tlang a, democracy ropuina vawng nung zel turin a chah nghal bawk.

He hun hi Asst Electoral Registration Officer (AERO), Lawngtlai SDC Pu H. Vanlalbiakzauva chuan a kaihruai a. Asst Electoral Registration Officer (AERO), Lawngtlai BDO Pu N. Lalzarzova kaihhruaiin NVD thu tiam sawi rual a ni a. Booth Level Officer (BLO) thawk ṭha thlan chhuahte leh Aadhaar seeding ti ṭhate hnenah chawimawina thilpek hlan niin, District PwD Icon HS Lalngaihzuala leh Electoral Literacy Club Campus Ambassador-te hnenah honorarium pek a ni a. Vote nei tharte hnenah Electoral Photo Identity Card (EPIC) sem niin, Lawngtlai DIPRO Pu C. Lalhruaitluanga chuan Chief Election Commissioner of India thuchah a chhiar chhuak a. ECI Indian Democracy theme song, "Main Bharat Hoon" tih music video thlir ho a ni bawk.

Best BLO chawimawina hlante chu - 36-Tuichawng bialah Pu Lokhi Dhan Chakma, Udalthanasora I; 37-Lawngtlai West-ah Pu Amo Ranjan Chakma, Pandawnglui leh 38-Lawngtlai East-ah Pu C. Lalnghaksanga, Vengpui South te an ni a. BLO zinga Aadhaar link ṭha lawmman pekte chu overall-ah 100% Aadhaar link Pu J. Lalrina, Tuichawngtlang; 36-Tuichawng-ah Pu Bright Star Mrinal, Ugudasury S; 37-Lawngtlai West-ah Pu Bipul Chakma, Sumsilui leh 38-Lawngtlai East-ah Pu HS Lalhmingthanga, Sangau Vengthar te an ni.

Vawiina Lawngtlaia NVD hmannaah hian official leh District Election staff-te, BLO-te, political party hrang hrang leh tlawmngai pawl ai awhte, chanchinbu mite leh Election Icon leh Ambassador-te, ELC member-te leh vote nei tharte an kal khawm a ni.