3366/2022-2023

Aizawl 25th January 2023: Vawiin khan New Delhi-ah Mizoram MP(LS) Pu C. Lalrosanga chuan hmarchhak bialtu Union Addl Home Secretary Pu Pijush Goyel chu Returnee hotute a hmuhpui a, Mizoram Inremna thuthlung anga returnee-te chhawmdawl chungchang a sawipui.

MP(LS) Pu C. Lalrosanga chuan Mizoram Inremna thuthlung siam chu hlawhtling hle mahse returnee-te chhawmdawlna pek dan erawh chu a tluantling rih lo a ni tiin an chenna tur in sakna leh inbenbelna kawngah sawrkar laipui tanpuina an la mamawh hle a ni tih Addl Secretary (North East) chu a hrilh a.   Returnee lam aiawhte pawhin  harsatna an tawh dante leh chhawmdawlna an la hmuh kim loh dante an sawi bawk. Addl. Secretary, Home hnenah hian Lok Sabha Member chuan Myanmar leh Bangladesh atanga sahimna zawnga Zohnahthlak rawn tlan lutte dawnsawn leh chhawmdawl chungchangte a sawi pahin, mihring dikna leh chanvo humhalh sak mai bakah a theih ang anga tanpui a ngen a. Union Addl Secretary Pu Pijush Goyel chuan Bangladesh lam hotute pawh Mizorama rawn tlan lutte chungchang hi a sawipui a ni tih a sawi.