3329/2023-2024

Lawngtlai dated 12th January 2024: Vawiin chawhnu khan Central YLA Hall, Lawngtlaiah National Youth Day lawmna pualin Nehru Yuva Kendra, Lawngtlai chuan ‘My Bharat – Viksit Bharat@2024’ tih thupui hmangin Declamation Contest an buatsaih a. Pu Johny H.Malsawmsanga, NYV chuan hun a kaihruai a Pu Vanlalchhana, District Education Officer chu khuallian niin Millie C.Lalremsangi, Class 10 zirlai, Harvard Higher Academy chuan lawmman pakhatna a la a ni.

Khuallian Pu Vanlalchhana, DEO chuan Nehru Yuva Kendra chu thalaite hnen a nungchang mawi te, tlawmngaihna chhawm nunna kawng a inzirtirna leh hrisel tur a kawng hrang hrang a taksa insawizawina tur hun leh hmun buatsaihna kawng a thawktu pawimawh tak an nih thu a sawi a. Lawngtlai district chhung a thlaite rilru leh thiamthil chher hriam nana ‘My Bharat – Viksit Bharat@2047’ tih thupui hmang a thu phuah inelna buatsaih a ni chu lawmawm a tih thu a sawi. Pu Vanlalchhana chuan tunlai khawvel changkang zel ah eizawnna tlak thiamthil neih tel a pawimawh thu sawiin mahni inrintawkna leh tunlai khawvel thiamna hmang tangkai thiam mi nih a tul tawh thu a sawi a. Chhungkua, khawtlang leh ram tan a mi tangkai leh chhawrtlak nih tum theuh turin a fuih bawk a ni.

Lawngtlai a National Youth Day pual a hun hmanna ah hian Pu V.Dohmingthanga, NYK chuan kalkhawmte lawmna thusawiin Pu Lalruatkima, SI chuan khawpui nuam leh himna siam tur a Traffic Rules zawm a pawimawh thu a sawi bawk a. Inelna endiktu Pu Hmingthanzuala, DIPRO leh Pi Laltanpuii, Lecturer, Govt. Region Higher Secondary School-te chuan lawmman semna hun an hmang bawk a ni. Lawmman pakhatna latu Millie C.Lalremsangi hian State Level a inelna ah Lawngtlai district aiawhin a tel dawn a ni.

National Youth Week hi ni 13 atanga ni 19, January chhung hman a ni dawn a, hemi chhung hian ram hmasawnna tur a thalaite pawimawhna pholang zawng a hun buatsaih tur niin Cultural Day, Participation Day, Social Service Day, Physical Fitness Day, Youth for Peace Day, Skill Development Day leh Awareness Day atan te hun hman a ni ang.