3330/2023-2024

LUNGLEI; the 12th, January,2024 : Vawiin chawhnu dar 2:00 khan Pu V.Malsawmtluanga MLA ( Lunglei North Bialtu MLA) chuan Vice Chairman, High Powered Committee (HPC) Lunglei atana Mizoram Sorkarin a ruat angin; a Office luahluhna leh Office hlanna HPC Lunglei Comference Hall-ah hman a ni.

Vice Chairman Office hlanna hun hmanna hi Pu C.Vanlalmuana, Chief Planning Officer, HPC Lunglei chuan a kaihruai a, Pu V. Malsawmtluanga chuan hmasawnna tluantling a awm theihna tura HPC din a nih angin theih tawp chhuah a tum thu a sawi a, Chief Minister Pu Lalduhawma kaihhruaina hnuaia MLA ten hlemhletna laka fihlim tura hmalak an tumna chu tha taka kalpui a tum thu a sawi bawk. Lunglei hmasawnna turah LMC te nen pawh a theih anga hmalak a, thawhhona tha tak an neih ngei a beisei tih a sawi. HPC in a Power a exercise theih chinah hna tha lo te chu action an la ngam dawn tih sawiin, Lunglei hian lungrualna tha nei a, hmalakna kawngah thawhpui zel turin mipui a sawm a, Lunglei mipuiten an mamawh nia a hriat tui chungchangah tuihna humhalhna kawnga hmalakah te theih tawp chhuah a tum thu leh PHE Department lam hotute nen hmalakna tur kawngah pawh thawhhona tha neih zel a duhthu a sawi bawk. Tunah hian Lunglei tuilakna tih hmasawnna tura sum sanction tur awm mek pawh hemi kawngah hian tangkai taka hman a nih theih a beisei thu leh Lunglei.Greater Water Supply Phase II chungchangah pawh theih tawp chhuah a tum thu tarlang bawk. Lunglei tan theih tawp chhuah a in huam thu leh hemi kawngah mipuite thawhpuina leh thurawn te pe thin turin Pu V.Malsawmtluanga MLA Vice Chairman HPC Lunglei chuan a sawm nghal a ni.

Vawiin hun hmanah hian Rev.Raltawnga ( Rtd) BCM in hunserh a hmang a, Pu Lalzuithanga, Chairman, Lunglei Municipal Council, Pu Lawmawma Tochhawng, Ex. MLA ,Vice Chairman HPC kalchhuakta bakah chhungkua aiawhin Pu V. Malsawmtluanga pa Pu V. Lalrinmawia ten thu an sawi a ni.

HPC Lunglei Office luahluhna leh hlanna hun hmanah hian Councillors LMC Officials, NGO hruaitute, MJA bakah Party hruaitute pawh an tel a ni.