835/2022-2023
Nikir thla ni 9, 2022: Vawiin khan Lawngtlai Additional Deputy Commissioner Pu James Miahlung hovin a office chamber-ah Lawngtlai District chhunga naupangte himna chungchang leh COVID-19 vanga naupang harsatna tawkte chhawmdawlna chungchang sawi ho a ni.
He hunah hian District Child Protection Unit (DCPU), ICDS District Programme Office leh BDO ai awhte bakah, District Administration official-te leh DIPRO te an tel a. Lawngtlai District chhunga naupang himna atana hma lakna dinhmun thlir ho niin, hmachhawp hrang hrangte sawi ho a ni.
He hunah hian October 2021-a District Child Protection Committee (DCPC) ṭhut khawm thu dah bawhzui dan thlir ho a ni a. DCPU lamin District chhung hmun hrang hrangah sikul leh kohhran programme-ah te naupang himna chungchang zirtirna an kalpui ṭhin thu te, District chhung zirna in tinah a bika naupangte himna kawng ngaihtuahtu Nodal Officer ruat vek tawh a nih thu leh sikul hrang hrangah naupangte'n an rilrua an thil vei ziaka an thlak theihna tur bawm - Happy and Sad Box hun a nih thu te, Lawngtlai khawpui chhunga naupang enkawlna hmun (child care institute)-te mamawh zir chiang tura DCPC hminga tlawh chhuah an nih thu te, CCI-te mamawh hrang hrang pawh a ṭul anga bawhzui a nih thu te ngaihthlak a ni.
Vawiin ṭhut khawmah hian Supreme Court-in SMWP (C) No. 4/2020 leh SMWP (C) No. 6/2021 hmang tea COVID-19 vanga nu emaw, pa emaw, an pahnih emawa chan naupangte chhawmdawlna tur chungchang leh hemi leh harsatna dang vanga naupang zirna chawlhsante'n zirna an chhunzawm leh theihna tur chungchangah hma la tura state leh union territory-te a tih angin Lawngtlai District dinhmun thlir ho niin, hma lak chhunzawm zel dan tur rel a ni bawk a. Lawngtlai District chhungah COVID-19 vanga nu emaw, pa emaw chan naupang 6 awmin, kum 3 - 17 inkar an ni a. An zinga chhawmdawl ngai naupang pahnih chu Integrated Child Protection Scheme (ICPS) aṭangin chhawmdawlna (sponsorship) ngaihtuahsak niin, January 2022 aṭang khan thla tin ₹ 2,000/- an dawng a ni.
Kum 2019 April thla aṭanga kum 2021 October ni 27 thleng khan Lawngtlai District chhungah naupang laka mipat hmeichhiatna lam hawia pawi khawihna (POCSO case) 30 awmin, October 27, 2021 aṭanga June 9, 2022 thlengin POSCO case 6 ziah luh belh a ni bawk a. Zau zawk leh mipui huam kim zawka inzirtirna kalpui chhunzawm zel ni se tih niin, social media hmangin uar zawkin mipui zirtirna theh darh ni se, tih a ni.
Attachment
- Loading attachment...
