834/2022-2023
Lunglei West bialtu MLA leh Agriculture etc Minister ni bawk Pu C.Lalrinsanga chuan a bial chhung Sazaikawn a awm District Jail Lunglei ah a MLA Fund cheng sing ruk (Rs. 60,000/-) senga ruahman jail tangte mamawh hrang hrang vawiin khan a hlan a ni.

Minister hi Agriculture Director Pu James Lalsiamliana, Lunglei DC Pu Kulothungan A leh District official dangte bakah Lunglei MJA leh party hruaituten an tawiawm a ni.

Hemi puala inkhawm tawi, MJEA (Mizoram Jail Employees Association) Hall, District Jail a neihah Pu C.Lalrinsanga chuan jail tangte hmangaih leh duat taka lo enkawl thin tu MJEA te chungah lawmthu sawiin an hna a pawimawh zia leh an mawhphurna a san zia hre thar turin a chah a. Jail tang mek te chu nun beidawng mai lo tur leh jail chu an nun siamthatna hmun atana hman tum tur leh an chhuah hunah pawh khua leh tui tha, ram leh khawtlang tana mi tangkai ni tura inpuahchah turin a chah a. An mamawhte inthlahrung hauh lova a hnena thlen thin turin a chah a ni.

Lunglei DC Pu Kulothungan A pawhin thu sawiin May ni 2, 2022 ah District jail a thlawh tuma jail thawktute leh jail tangte an mamawh hrang hrang a hnena an thlen bawhzuiin kar hmasa khan CMO Lunglei kaltlangin Free Health Camp te pawh buatsaih sak an nih thu a sawi a. Lunglei District Jail a tangte chu Jail an awm chhunga thiam thil zirna (skill development) ruahman sak a ngaih pawimawh takzet thu sawiin hemi kawnga hmalak zel a tum thu a sawi bawk.

Vawiin program hi Pu C.Lalbiaktluanga, Superintendent, District Jail in a kaihruai a, jail tangte hian an thil siam chhuah (painting leh flower vase) te Minister leh official thenkhat hnenah an hlan a ni.

Jail tangte tana hman tur thilpek te chu LED TV (40 inches), Acoustic guitar pahnih, Emergency Light panga, Dustbin pariat, Sanitary pad case khat, mosquito repellant dozen thum, volleyball leh net pakhat ve ve leh table table tennis ball panga te an ni.