833/2022-2023
Aizawl, 9th June, 2022 : Vawiin khan Mizoram Sorkar hnuaia Department hrang hrang – Transport Department, Traffic Police, SIRD&PR leh Mizoram Taxi Association te tangkawp buatsaihin Taxi Sticker A Driver-te tan “Orientation Training for Taxi Drivers/Opeartors” Vanapa Hall-ah neih a ni a, Pu K.T. Beicho, IRAS, Commissioner & Secretary, Transport Department chuan Khuallian niin he training hi a hawng a ni.

Khuallian Pu K.T. Beicho chuan Taxi Driver-te tana pawimawh tak training buatsaih a ni chu lawmawm a tih thu sawiin, a buatsaihtute chungah lawmthu a sawi a. Driver-te hi ram leh hnam rawngbawltu leh darthlalang in ni a, mipui rawngbawltu in ni a, in pawimawh em em a ni, a ti a. Chuvangin, ruihtheih thilah kan fihlim a pawimawh a, Traffic Rule-te kan zawm a pawimawh a ni a ti.

Khuallian chuan mihring kan pung a, lirthei a pung zel a, ram changkang zawkte’n harsatna an tawh avangin Public Transport an hmang nasa a, keini pawh hian tun ang zela kan kal chuan Public Transport hi nasa zawka kan hman a la ngai dawn a, chung hun atan chuan Taxi Driver-te pawh kan inbuatsaih a ngai a ni, a ti.

Driver-te chungah hian in mi phurh (passenger)-ten beisei an nei a, chu an beisei chu an tum hmun/ram thlamuang tak leh him taka thlen a ni a, chu chu in mawhphurhna a ni tih inhriat reng a, intihhlawhtlin a ngai a ni, Transport Commissioner & Secretary chuan a ti bawk.

Pu Beicho chuan Traffic Rules hi kan himna tur a ni tih hriain, kan zirtirtu tha leh thian tha-ah ngai a, kan zawm tha tur a ni, a ti a. Tin, Driver-te hian kan lirtheite fai takin kan enkawl tur a ni a, min hmangtu turte’n chuan an chak theih nan kan uluk tur a ni. Keimahni leh kan thawmhnawte pawh a fai tur a ni a, kan inchei uluk tur a ni, a ti bawk.

Khuallian chuan an thil phurhah an fimkhur a ngaihthu sawiin, dan phalloh leh drugs/zu-te an phurh loh nan fimkhur tura chahin, ruihhlo hi kan thalaite nun tichhetu a nih avangin Driver-te pawh ruihhlo laka fihlim turin a chah a ni. Training ngai pawimawha heti zat inrawn kal hi inchungah lawmthu ka sawi a ni, a ti.

He Training hawnna inkhawm hi Pu Rodingliana Chawngthu, MPS, Sr. SP, Traffic chuan kaihruaiin, inlawmna thu a sawi a. Pu Ralthanmawia, President, Mizoram Taxi Association hnen atangin thusawi ngaihthlak a ni a, Pu Khuangthansanga Pakhuangte, Associate Professor, SIRD&PR chuan lawmthu sawiin a hawnna hi hun a khar a ni.

He training hawnna hun hman zawh hnu hian Technical Session hman chhunzawm nghal a ni a. Pu C. Lalbiakthanga, Joint Director (STA), Transport Department hnen atangin “Motor Vehicle Acts & Rules: Documentations & Registrations” chungchang ngaihthlak a ni a, Pi Golda Dell Zohmangaihi, Core Faculty, ATI hnen atangin “Manners & Etiquette” thupui hmangin zirtirna ngaihthlak leh niin, Pu H. Laltanpuia, Inspector, OC, Traffic hnen atangin “Motor Vehicle Driving Regulations & Responsibilities” tih thupui hmangin zirtirna ngaihthlak a ni bawk.

Vawiin training-ah hian Taxi (Sticker – A) Driver mi 1003 an tel a, ni 6.6.2022 (Thawhtanni) khan Taxi (Sticker – B) Driver-te tan training hi buatsaih niin mi 710 leh ni 7.6.2022 (Thawhlehni) khan Taxi (Sticker – C) Driver-te tan training hi buatsaih niin mi 785 an tel bawk a ni.