3231/2022-2023

Pawlkut thla ni 12, 2023: Vawiin kha National Youth Day vawi 39-na a ni a. Lawngtlaiah chuan Nehru Yuva Kendra (NYK) huaihawtin Vista English School, College Vengah zirlaite leh NYK hnuaia youth club te nen he ni hi hman a ni.

He huna Khuallian, Lawngtlai District Information & Public Relations Officer Pu C. Lalhruaitluanga chuan kum 2023 National Youth Day thupui, "Developed Youth - Developed India" (Ṭhalaite hmasawnna hi India ram hmasawnna a ni) tih thu hmangin ṭhalai kal khawmte fuihna thu a sawi a. Ram hma hun chu vawiina ṭhalaite kutah a innghat tih sawiin, ramin hma hun eng tak a neih theih nan tun aṭanga inbuatsaihna ṭha neih a ṭul tih a sawi a. Ṭhalaite chu mahni hma chauh ngai lo va, ram tana chhawr tlak nih tum tura chahin, zirna ngai pawimawh tur te, ruihhlo laka inthiar fihlim tur leh tumruhna nena hma hlen tum tur te'n a fuih a ni.

He hun hi NYK Lawngtlaia NYV Pu Johny H. Malsawmsanga'n kaihruaiin, kal khawmte lawmna thu leh National Youth Day ṭobul a sawi a. Swami Vivekananda thu sawi pawimawh tak tak, ṭhalaite fuih phurna tur a tar lang a. Vista English School Principal Pu Lalramhluna'n thu a sawi bawk.

Sakhaw puithiam, philosopher leh ram zalenna sual laia mipui rilrua ram hmangaihna tuh kawnga thawh hlawk tak leh ṭhalaite hmakhua ngai tak, Swami Vivekananda pian ni January ni 12 hi kum 1984 khan India Sawrkar chuan National Youth Day-ah puangin, kum 1985 aṭang khan kum tin hman ṭhin a ni a. Thupui thlan bik neiin, ṭhalaite fuih phurna leh ṭhalaite hmakhua atana buatsaihna leh zirtirna ni atan India ram hmun hrang hrangah hman ṭhin a ni.

Attachment

  • Loading attachment...