1147/2021-2024

2023 Vawkhniahzawn thla ni 15: Vawiin khan Nehru Yuva Kendra (NYK), Lawngtlai District leh Government Lawngtlai College (GLTC) ṭang kawp huaihawtin Central YLA Hall, Lawngtlaiah ṭhalaite kutpui, "Yuva Utsav - Lawngtlai District Level Youth Festival" buatsaih a ni.

He huna Khuallian, Lai Autonomous District Council (LADC) Chief Executive Member (CEM) Pu V. Zirsanga chuan India ramin zalenna a hmuh aṭanga kum 75 a tlin lawmna a kal mek laiin, kum 100 a tlin hun atana ram hruaitute hmathlir ṭha tak tihlawhtling turin hma lak ṭan leh mek a nih thu sawiin, chu hmathlir leh hma lakna a hlawhtlin theih nan chuan tuna ṭhalaite hi an pawimawh hle a ni, a ti a. Ram hmasawn, ram changkang leh intodelh ni turin hriatna leh thiamna tihpun zel a pawimawh tih sawiin, ṭhalaite chu hriatna lama tuihal a, an theihna tipung zel turin a chah a. Rilru leh ngaihtuahna lama mi dang el pha lo tur nia inngaihna, mi theih ang thei ve lo tura inngaihna chu hmasawnna leh mihring ṭhan zelna daltu lian tak a nih thu sawiin, mahni inrin tawkna nen khawvel hmachhawn a, danglamna thlentu nih tum turin a chah a. Ṭhalai kal khawmte chu mahni hnam ziarang leh nunphung ngaihlu a, ram leh hnam hmangaihna rilru pu tur leh an phak tawka a ṭha ber ram leh hnam tana sawr chhuak tura chahin, ngaihtuahna thar nen khawvel tukverha dak a, hmasawnna tluantling nei tura ke pen turin a chah a ni.

He hun hi Pi L. Vanchhawng, MEMS Lawngtlai chuan kaihruaiin, LIKBKṬP Secretary Rev. Lalropeka Chinzah chuan hunserh a hmang a. NYK-a Deputy Director Pi Mercy Sellate chuan hun hman chhan sawi fiahin, ṭhalaite fuihna thu a sawi a. Lawngtlai Sub-Deputy Commissioner Pu Samuel Lalmalsawma Sailo leh Central Young Lai Association (CYLA) General Secretary Pu Joseph Lalhmingthanga Chinzah te chuan ṭhalai kal khawmte fuihna thu an sawi a. Swachh Bharat Mission (Grameen) aṭangin Coordinator Pu Benjamin Lalrinzuala chuan SBM-G hma lakna sawi fiahin, tui renchem leh faina kawnga theih tawp chhuah turin zirlai kal khawmte chu a sawm a. GLTC Associate Professor Pu Mc. Lalrokhuma'n lawm thu sawiin hun a khar a ni.

He "Ṭhalaite Kutpui"-ah hian LADC-a Executive Member Pu C. Hrangṭhianga bakah, sawrkar official-te, zirtirtu leh zirlaite leh ṭhalai eng emaw zat an kal khawm a. Thupui thlan sa hmanga thu insawi siakna, "declamation contest" leh hnam lam intihsiakna, "cultural dance competition" te buatsaih a ni a. Zaithiam zai te ngaihthlak niin, state leh LADC hnuaia department hrang hrang, bank leh mimal sumdawngte chuan exhibition leh food stall hrang hrang an siam a. Yuva Utsav puala zirlaite tana intihsiakna chi hrang hrang buatsaiha ti ṭhate hnenah lawmman sem a ni bawk.

He Yuva Utsav thupuiah hian "Panch Pran of Amrit Kaal: India @2047" tih chu thupui atan hman a ni a. Kum 2047-ah chuan India ram chu ram hmasawn leh intodelh nihtir te, sal tang rilru aṭanga chhuah zalen te, hnam ziarang leh hlutna chawi san te, inpumkhatna vawn nun leh khua leh tui ṭha siam te chu he hma lakna hian a tum a ni.

Declamation contest-ah hian Milley C. Lalremsangi chu pakhatna niin, pahnihna H. Lalramthangpuii leh pathumna Steven Lalengkima te an ni a. Lawmmanah hian thuziak (certificate) bakah, pakhatnain ₹ 5,000/-, pahnihnain ₹ 2,000/- leh pathumnain ₹ 1,000/- te dawngin, pakhatna hian state level declamation contest-ah Lawngtlai District ai a awh ang.

Cultural dance competition-ah hian Lai Cultural Club, Council Veng chu pakhatna niin, pahnihna YLA Thingkah Branch Art & Culture leh pathumna YLA Mampui Branch te an ni a. Yuva Utsav young artist talent hunt - poetry writing competition-ah Immanuel Lalneihhlua chu pakhatna niin, painting competition-ah Bidhan Chakma chu pakhatna a ni a, mobile photography competition-ah Christina Lalhruaitluangi chu pakhatna a ni thung.