340/2024-2025 

2024 Ṭau thla ni 23: Vawiin khan School Education Department hnuaia PM POSHAN, Mizoram huaihawtin Chandmary Inpui, Lawngtlaiah Lawngtlai RD Block leh Bungtlang 'S' RD Block huam chhunga sikul zirtirtute tan sikul naupang tana chawchhun sem kalpui dan chungchangah "One-day workshop on Management of PM POSHAN" buatsaih a ni.

He hun hi School Education Department-a Joint Director Pi R. Lalnunthari chuan hmanpuiin, sikul zirtirtu kal khawmte chu zirlaite hriselna ngai pawimawh turin a chah a. Chawchhun sem kalpui chungchangah state lamin theih tawp chhuaha sawrkar laipuia record ṭha nei tura hma an lak ṭhin thu leh zirtirtute ṭhenkhatin report update zung zung nachang an hriat loh avanga harsatna a thlen ṭhin thu a sawi a. Mizorama zirnain hma a sawn theih nan leh zirlaite'n hma sawnna tluantling an neih theih nan ṭhahnem ngai taka thawk zel turin zirtirtu kal khawmte chu a fuih a ni.

He hun hi Samagra Shiksha Lawngtlaia Additional District Programme Coordinator Pu H. Lalṭanpuia'n a kaihruai a. PM POSHAN Programme Coordinator Pu HC Zirtluanga leh Programme Assistant Pu Lalrinngheta Sailo te'n PM POSHAN chungchanga hriat tur pawimawh hrang hrang te, mid-day meal account vawn dan leh update dan te an zirtir a. Zawhna leh chhanna leh sawi hona hun hman niin, Samagra Shiksha Lawngtlaia Deputy DPC Pu Alex Lalzawmpuia'n lawm thu sawiin hun a khar a ni.

He workshop-ah hian Lawngtlai District hnuaia Bungtlang 'S' Block leh Lawngtlai Block aṭangin sikul ai awhin PM POSHAN enkawltu zirtirtu 150 an tel a. Naktukah khian PM POSHAN Workshop hi CADC area-a sikulte tan buatsaih leh tura ruahman a ni.