Nimin (9.12.2016) khan Pradhan Mantri Surakshit Matritva Abhiyan (PMSMA) hnuaiah Lawngtlai District chhunga nu nau paite tana a thlawna inentirna Clinic buatsaih a ni a.
He Clinic hi District Hospital OPD-ah leh hmun hrang hranga PHC leh CHC-ah te buatsaih a ni. PMSMA hian a tum ber chu, nuin nau an pai hun chhung 2nd trimester (thla 4 atanga thla 6) leh 3rd trimester (thla 7 atanga thla 9)-ah te vawi khat tal doctor hnenah ngei an inentir theih nana hma lak a ni a. He Clinic-a inentirte chu a thlawnin ultrasound, zun test, HB test, Blood Group test leh HIV test te tihsak an ni.
He scheme hi sawrkar laipuiin nau chunga nu thihna (maternal death) tihniam tura hma a lakna kal zel a ni a. Mizoram chhungah pawh chak taka kalpui mek niin, Lawngtlai District-ah chuan July thla atang khan thla tin ni 9-ah hman thin a ni a. District Hospital-ah mai ni lovin, PHC leh CHC-ah te pawh kalpui a ni.
