Vawiin khan Lawngtlai NIC Conference Hall-ah MLA Inthlanpui 2018-a Lawngtlai District-a polling official turte duty-na tur constituency thliar fel (randomise) a ni.

He hunah hian Election General Observer Pu P. Bala Kiran IAS, District Election Officer & 37-Lawngtlai West constituency RO Pu N. Chakhai MCS, 36-Tuichawng constituency RO Pu R. Lalremsanga MCS, Media Nodal Officer Pu C. Lalhruaitluanga MIS leh NIC official-te an tel a. Election Commission of India (ECI) randomisation software hmangin polling official-te duty-na tur constituency hi thliar fel a ni.

Lawngtlai District-ah hian assembly constituency pathum awmin, polling station 161 a awm a. 36-Tuichawng (ST) AC-ah polling station 59 awmin, 37-Lawngtlai West (ST) AC-ah polling station 68 leh 38-Lawngtlai East (ST) AC-ah polling station 34 a awm a. Polling station tinah hian polling official pali (4) zel an awm dawn a ni.

Hemi hma hian 1st randomisation-ah polling official leh reserve turte thliar fel a lo ni tawh a. Tun hi 2nd randomisation niin, 3rd randomisation-ah chuan an duty-na tur polling station theuh thliar fel a ni tawh ang.