Vawiin khan Member of Parliament (Lok Sabha) Inthlanpui 2019 lo awm tura Lawngtlai District chhunga polling station 165-a Presiding Officer (PRO) leh Asst Presiding Officer (APO) tura ruatte tan Lawngtlaia Don Bosco School-ah a tum hnih nan training buatsaih leh a ni.

Vawiina training buatsaih hi Lawngtlai District Election Officer (DEO) Pi Shashanka Ala, IAS chuan a hmunah tlawhin, training kalpui dan leh trainee-te an kal that leh that loh a en a. Trainee-te chu an mawhphurhna pawimawhzia hria a, a huna buaina an tawh loh nan an thil zira ngun taka rilru pe tur leh tha taka an mawhphurhna hlen chhuah tum turin a chah.

Training-ah hian polling official-te tih tur leh mawhphurhna hrang hrang bakah, EVM hman dan leh enkawl dan (EVM hands-on training) te zir ho a ni a. Sawi hona leh zawhna leh chhanna hun hman a ni bawk. Polling official-te hi hmun rukah inthen darhin, District Level Master Trainer-te - Pi Carolyn LB Khiangte MCS, Pu Lalneihthanga Colney MCS, Pu Lalsanglura MCS, Pu Alex Lalzawmpuia (LADC), Pu Collins Ngurnunchunga (LADC) leh Pu Jonathan Lalrinliana (KVK) te'n training hi an pe a ni.