State sawrkar hma lakna pakhat NEDP hnuaia Chief Minister Rural Housing Scheme chu vawiin khan AH & Vety Minister Pu C. Ngunlianchunga'n LADC Conference Hall, Lawngtlaiah Lawngtlai District tan a hawng.
Pu C. Ngunlianchunga chuan sawrkarin mipuite mamawh a hria a, an tana hamthatna awm thei tur te kawng hrang hrangin a dap reng a, hma an sawn theih nan NLUP hmang ringawt pawhin chhungkaw tam tak a tanpui tawh a ni, a ti a. Tunah NEDP hmangin kawng hrang hrangin hma lakna kalpui leh mek a ni a, hemi hnuaiah hian mi harsa leh chhumchhia zawkte'n chenna in an neih theih nan Chief Minister Rural Housing Scheme pawh chu kalpui a nih thu a sawi.
Pu C. Ngunlianchunga chuan sawrkar department hrang hrangte'n dan pangngaia mipui hma sawn nana hna an thawh thin piah lamah, NEDP hnuaiah chuan kawng tinrengah hma sawnna lian zawk a awm theih nan huam zau zawka hma lak chhoh zel a ni, a ti a. NEDP hnuaia hma lakna atanga hlawhtlinna hrang hrang awm chu sawi kim vek sen a nih loh thu sawiin, hmarchhak state dangte'n an entawn atana chhawp chhuah hial a nihna chuan NEDP thatzia a tarlang chiang hle a ni, a ti.
Thu a sawi zawhin Pu C. Ngunlianchunga chuan a bial Lawngtlai West chhunga NEDP hnuai atanga puanthui khawl leh mistiri bungrua dawng tur mi 42 ve ve hnenah khawl leh bungrua a hlan nghal bawk.
Vawiina CM Rural Housing Scheme hawnna hun hi Lawngtlai DRDA Project Director Pu R. Lalremsanga MCS chuan a kaihruai a. Lawngtlai Bawrhsap Pu N. Chakhai MCS chuan inlawmna thu sawiin, LADC CEM ai awhin EM i/c LAD Pu H. Chhuanawma'n thu a sawi a. EM i/c Agriculture Pu C. Sangchhunga'n lawm thu sawiin hun a khar a ni.
Chief Minister Rural Housing Scheme hi Mizorama a bul tan nan nikum khan Lawngtlai leh Siaha District-ah kalpui a lo ni tawh a. He scheme hnuaiah hian Lawngtlai District-a chhungkaw 500 hnenah chhungkaw pakhat tan Rs 50000/- zelin sem chhuah a lo ni tawh a ni.
Vawiina CM Rural Housing Scheme hawnnaah hian LADC-a Executive Member leh member dangte, state leh LADC official-te leh sawm bik mi eng emaw zat an tel a ni.
