Sawrkar laipuiin ruahmanna a siam anga mipuite'n an chanvo tur dik tak an chan theih nana ration sem dan thar kalpui mekah vawiin khan Lawngtlai BNRGSK Hall-ah Lawngtlai District Civil Supply Officer (DCSO) hnuaia retailer-te chu Electronic Point of Sales (ePoS) Device hman dan zirtir an ni.

DCSO Lawngtlai hnuaiah hian retailer 107 awmin, he'ng retailer-te leh an zinga ePoS device hman harsat tura inngaite'n an ai awha he khawl hmanga ration sem tur an ruat chhawnte he training-ah hian an tel a. DCSO Pu B. Liansiama chuan retailer-te'n ration sem dan thar hi an hman ngei ngei a ngaih thu leh hmang lo tura chhuanlam siam theih a nih loh thu sawiin, he khawl hi hmang thei ngang lo an awm chuan retailer an nihna thlenga bansan a ngaih mai a hlauhthawnawm thu a sawi a. Thiam ngei tum a, tih tak zeta khawl hman dan chu zir turin retailer kal khawmte chu a chah.

ePoS hmanga ration sem a nih theih nan hian Food, Civil Supplies & Consumer Affairs Department chuan ruahmanna thui tak lo kalpui tawhin, mipuite ration card leh aadhaar card thlun zawmsakin hun rei tak atangin hma an lo la tawh a. He kalphung (system) thar hi Lawngtlai District-ah thla thar, March thla atanga hman tan tum niin, ration card leh aadhaar thlun zawm lote chuan ration buhfai an la thei tawh dawn lo va, bukna atan pawh electronic weighing scale hman a ni tawh dawn a, buk dik lo awm lovin mipuite'n an chanvo dik tak an chang thei tawh dawn tih vawiina retailer training-ah hian sawi lan a ni.

Vawiina retailer kal khawmte hnenah hian ration sem dan thar an hman tura an mamawh tur khawlte sem nghal vek a ni.