Vawiin kha khawvel pum huapa Rualbanlote Ni a ni a. Lawngtlaiah chuan Social Welfare Deptt, SSA Mission, RMSA leh Eirene Society te ṭang kawp huaihawtin he ni hi hman a ni.

LADC Hall, Lawngtlaia he hun hman hi District Education Officer Pi Zohmangaihi chuan a kaihruai a. Khuallian, SDO(Sadar) Pi Rochuangkimi Khenglawt chuan kum 1992 aṭanga UNO-in Rualbanlote Ni hi ni pawimawha a puan thu leh he ni hi vohbikte'n an dikna chanvo an chan theih nan te, an talent hrang hrang hai chhuah nan te hman ṭhin a nih thu sawiin, he'ng vohbikte hi sawrkar chuan a ngaihsak em em a, an tana hamṭhatna tur hrang hrang a bikin a ruahmansak ṭhin a ni, a ti. Pi Rochuangkimi chuan he'ng rualbanlo, vohbikte hi kawmngeihin, kan zinga an tel ve theih nan ṭhianah kan siam tur a ni a, mi dangte nen kan dah hrang bik tur a ni lo, a ti bawk.

He hunah hian Eirene Society, Lawngtlaia Finance Secretary Pi Vanhlamawii chuan Eirene Society hma laknate sawiin, vohbik enkawl lai an neihte chu kar tin ni 3 chhung therapy an tihsak ṭhin thu a sawi a. Hemi atana therapist an rawih chu Gov't Lawngtlai College-a Associate Proffessor Pu Remlalnghaka chuan an rawih tirh aṭanga vawiin thlenga a lawmman tur thla tin a tumsak avanga an lawmzia sawi langin, Eirene Society chuan he'ng vohbikte enkawl zel tur hian chak takin hma a la mek zel a ni, a ti.

Lawngtlai District SSA Mission-a Asst Co-ordinator Pi S.Lalrinpuii chuan SSA Mission hnuaia vohbikte tana zirna an kalpui dan leh a bik taka enkawlna an kalpui dante chipchiar takin a sawi bawk.

He hunah hian RMSA Lawngtlai District-a Dy DPC Pu H. Laltanpuia chuan hun hman chhan leh buatsaih a nih dan sawiin, vohbikte aṭangin zai ngaihthlak a ni a. He hun hmannaa vohbik kal zawng zawngte chu thilpek hlan vek an ni a. Social Welfare Department, Lawngtlaia Project Co-Ordinator Pi F. Lalengvari chuan lawm thu sawiin hun a khar a ni.