Vawiin khan Ramchhung hmundangte rualin Chhimveng YMA Hall Mamit-ah International Day Of Persons with Disabilities hman a ni a. He hun hi Pu Vanlalngaihsaka District Bawrhsap chuan khuallian niin a hmanpui.
He hun hmanpuitu Pu Vanlalngaihsaka chuan khawvel ram hrang hrang insuihkhawm pawl UNO chuan kum 1992 atang khan pianphung leh rilru lama rualbanlote pual bikin thupui bik siamin hun hman chhoh tan a nih thu a sawi a. Hamthatna hrang hrang zirna, eizawnna leh midangte ruala an kal ve theihna turin ruahmanna hrang hrang siamsak an ni a ti. Chutihrual chuan keini pianphung leh rilru lama harsatna neilote'n kan khawtlang nun leh kan society a thuk zawka hmun an chan theih nan tihtur tam tak kan nei a ni tih kan hriat a pawimawh a. Chu chuan khawtlang leh ram hmasawnna tura ke an pen ve na tur leh an nunkhua hrim hrimah kawng thui takin a hril ve dawn a ni a ti bawk.
He hun hi Pi Lalnunthari District Education Officer chuan kaihruaiin Pi Rozamliani, IE Co-ordinator RMSA leh Pi Mary Lalmalsawmi, IE Co-ordinator SSA Mamit District-te chuan Mamit District chhungah pianphung leh rilru lama harsatna neite tana SSA Mission kaltlanga hmalak dan tlangpuite tarlangin tun dinhmunah hian Mamit District chhungah rualbanlo Middle School leh Primary zirlaiah vohbik mi 443 kan neih mek thu leh vohbik Higher leh High School zirlai 136 te chuan midangte ang bawkin Zirna inah enkawlna an dawn mek thu an tarlang a ni.
Pi Lalrinpuii, District Programme Officer chuan Social Welfare Department hnuaia vohbik te'n chanvo leh hamthatna an neih angte a tarlang bawk.
He hunah hian Mamit khawpui chhunga zirna lama
thawktute, Zirlai naupang thlanchhuahte leh Zirtirtute telin Items hrang hrang
hmanga intihlimna hun hman a ni.
