No.3676/2021-2022

Pawlkut thla ni 15, 2022: Special Summary Revision, 2022 neih zawh taka Lawngtlai District-a assembly bial pathuma final electoral roll chu vawiin khan Lawngtlai District Election Officer, Lawngtlai Bawrhsap ni bawk Dr Andrew H. Vanlaldika chuan DC Conference Hall-ah a tlangzarh a. Final electoral roll, 2022 hi political party ai awhte hnenah a hlan nghal.

Lawngtlai DEO chuan a hun taka final electoral roll, 2022 tlangzarh theih a ni chu thawktute inpekna vang a nih thu sawiin, lawm thu a sawi a. Political party ai awhte chu uluk taka electoral roll chu zir chiang a, dik lo leh felhlel a awm palh pawha siam that dan turah finchhuah turin a chah a. Inthlan dawn hnaihah leh mamawh hunah chawpchilh taka buai chuk chuk ngai lo turin, voter-te paw'n electoral roll-a an chuan leh chuan loh emaw, an chanchin kimchang tar lan a dik leh dik loh emaw te enfiah nachang hre turin leh siam that ngaite a hun laia siam thattir nachang hre turin a chah bawk.

Vawiina tlangzarh tak Lawngtlai District final electoral roll, 2022-ah hian 36-Tuichawng (ST) Assembly Constituency (A/C)-ah vote nei mipa 17,330 leh hmeichhia 16,870, an vaiin mi 34,200 an awm a; draft roll aia a punna hi 1,178 a ni. 37-Lawngtlai West (ST) A/C bialah vote nei mipa 14,216 leh hmeichhia 14,058, an vaiin mi 28,274 an awm a; draft roll aia a punna hi 806 a ni. 38-Lawngtlai East (ST) A/C bialah voter mipa 12,140 leh hmeichhia 12,994, an vaiin mi 25,134 an awm a; draft roll aia a punna hi 537 a ni. Lawngtlai District-ah hian a pumpuiah vote nei mipa 43,686 leh hmeichhia 43,922, an vaiin mi 87,608 an awm a; draft roll atangin voter 2,521-in an pung a ni.

36-Tuichawng biala polling station 70 awmah, voter 1,019 awmna 36/34-Ugudasury South P/S chu voter tamna ber niin, voter 128 awmna 36/51-Charluitlang P/S chu voter tlemna ber a ni a. 37-Lawngtlai West biala polling station 69 awmah, voter 989 awmna 37/1-Chawngte 'P' P/S chu voter tamna ber niin, voter 71 awmna 37/34-Hlimzawl P/S chu voter tlemna ber a ni a. 38-Lawngtlai East biala polling station 42 awmah, voter 1,051 awmna 38/25-Sangau Vengthar P/S chu voter tamna ber niin, voter 110 awmna 38/11-Council Veng East-II P/S chu voter tlemna ber a ni thung.

Lawngtlai District final electoral roll, 2022 hi mahni bialtu Booth Level Officer (BLO) te hnenah emaw, Electoral Registration Officer (ERO) te hnenah emaw, DC office Election Branch-ah emaw, online-in NVSP Portal, nvsp.in emaw, electoralsearch.in emaw-ah te a duh tan en theih a ni.