Vawiin hi 4th Mizoram State Anti-Tobacco Day a ni a. Hemi pual hian Lawngtlai District-ah chuan National Tobacco Control Programme (NTCP) bultumin Don Bosco School auditorium-ah pencil drawing competition buatsaih a ni.

He hun hi NTCP Lawngtlai District Nodal Officer Dr S. Thaizi chuan a hmanpui a. Zirlaite chu vaihloin taksa a tihchhiat theih dan te hrilhin, vaihlo leh a kaihhnawih laka fihlim hram hram turin a ngen a ni.

Kumin State Anti-Tobacco Day-ah hian "Vaihlo tel lo infiamna" tih chu thupuiah hman a ni a. Lawngtlaia a hmannaah hian Lawngtlai khawpui huam chhunga high school thlan bikte atangin zirlai 25-in 'vaihloin mihring taksa, chhungkua leh khawtlanga chhiatna a thlen dan' tih thupui hmangin lem an inziahsiak a ni.