Vawiin chawhma dar 11:00AM khan Mizoram hmun dang te rualin Siaha-ah pawh DIET Conference Hall-ah "Tobacco Free Sports-Vaihlo tel lo Infiamna " tih thupui hmangin 4th Mizoram State Anti- Tobacco Day hman a ni.

He Anti -Tobacco Day -2017 programme hi Pu H.Lalfakzuala,Principal DIET, Siaha District in a kaihruai a, Dr.HTC.Lalrinchhana, Judge Fast Track Court chuan khuallian niin he hun hi a hmanpui.

Khuallian Dr.HTC.Lalrinchhana chuan Infiammi te chuan zuk leh hmuam laka fihlim tura midang te zirtirna kawngah hmaruaitu leh sulsutu an ni tih hre reng tur leh midang te entawn tlaka an nun a ngai thu sawiin, Infiamna eng chi-ah pawh zuk leh hmuam tih reng chung chuan hlawhtlinna tluantling hmuh hi thil beisei awm lo tak a ni, a ti.

Vai hlo zuk leh hmuam that lohna hrang hrang te bakah dan lamah inzirtirna neih a ni a.Dr.C Hniechho Sr.MO pawhin thu sawiin, Vaihloin hriselna a nghawng theihdan te a sawi a. Pu ZT. Vawra Hmar District Consultant in power point presentation hmangin zirtirna hun a hmang bawk.

Vawiin 4th Mizoram State Anti-Tobacco-2017 hmanna programme-ah hian Sports Discipline hrang hranga infiammi te leh sawmbik mi pawimawh te an tel kim hle a ni.