Mizoram State  Sanitation Task Force hnuaia khawpui fai thlan tur atana inbuatsaihna chuan a vawrtawp thleng chho mekin  Mamit khawpui chuan beihpui a thlak  mek zel a, tukin khan Pi Lalbiaksangi District Bawrhsap hovin a thawhhnihna atan  khawpui chhung veng hrang hranga hmalaknate a hmunah enfiah leh a ni.

Khawpui fai thlanna turah Mamit khawpui thlan a nih ve ngei theihna tur hian kawng hrang hranga hmalakna-ah theihtawp chhuah chhoh mek a ni a. Village council hrang hrangte chuan an huam chhung theuhah vantlang hnatlang hi veng chhung dinhmun a zirin huaihawt thin a ni, veng thenkhatah  chuan vantlang hnatlangpui hi vawi hnih vawi thum koh nawn a ni tawh a ni. Hetih lai hian Sorkar Department hrang hrangte chuan office leh a chhehvel tifaiin hnatlang an lo nei tawh bawk a ni. Chhungtin, kohhran leh NGO hrang hrangte pawhin he inelna tur hian hma an la chhoh  mek zel a  ni.

Tukina veng hrang hrang endik tur hian team hrang hrang pathumah insiamin Team khatna hi Pi Lalbiaksangi District Bawrhsap chuan hovin Team hnihna hi Pu H. Lianzela Addl D.C  chuan a ho a,  Pu Narayan Thapa S.P Mamit chuan team thumna a hi a ho bawk a ni, team hrang hrang te hian khawpui chhung veng hnih theuh an endik a ni.  Veng hrang hrang te'n kawng hrang hranga  hma an lo lak tawhna chu lawmawm an tih rualin vantlang zunin, vantlang hall te leh khawpui chhunga lungrem na lai te chu chinai hmanga lo hnawih thar leh turin vengtin VC te mawhphurhna pek leh an ni a. Hei bakah hian bazar hmuna bawlhlawh paihna te chu felfai leh zuala lo sawngbawl turin bazar awmna vengte V.C te chu lo enzui pui tura tih an an ni bawk.