Kumtina neih thin Mizoram Civil Services Sports & Cultural Association Annual Sports Meet vawi 30-na chu vawiin chawhma dar 11:00 khan R.Dengthuama Multipurpose Indoor Stadium, Mualpuiah Pu Hmingdailova Khiangte, MLA, Vice President - Mizoram Olympic Association  ni  bawk chuan a hawng.

Mizoram Civil Services Sports & Cultural Association Annual Sports Meet hi Inter Departmetal Sports  tia  hriat thin chu a tirah chuan Badminton game hmangin bul tan a nih thu leh  tunah chuan discipline 6 zetah inelna neih a ni ta hi lawmawm  a tih thu Khuallian Pu Hmingdailova Khiangte chuan   sawiin  Sawrkar hnathawk infiammi tha tak tak an awm a, Sports hmang hian department hrang hranga thawkten inunauna tha zawk leh thawhona tha zawk an neih theih phah thin a, hetianga inelna tihlen a ni chho zel pawh hi a lawmawm tak meuh meuh a ni tiin infiammi kalkhawmte duhsakna a hlan.

Civil Services Sports Meet hawnna inkhawm hi Dr.Chawngthanchhunga, Sr.Vice President, MCSS&CA chuan a kaihruai a, Pu Zothanmawia, Chairman, MCSS&CA chuan welcome speech neiin Pu Rosangliana, Secretary, MCSS&CA chuan report a pe a, C.Vanlalchhuanga, Boxing Coach, SYS kaihhruaina hnuaiah Oath Taking neih a ni.

Mizoram Civil Services Sports & Cultural Association Annual Sports Meet vawi 30-naah hian inelna discipline 6 - Badminton, Table Tennis, Chinese Checker, Shooting, Chess leh Carrom te a awm a.

Badminton-ah department hrang hrang 24 atangin players 460 an tel a, players thawhhnem ber SIPMIU & PHE leh Secretariat & Allied Department te chuan players 45 ve ve an thawhchhuak a ni.

Table Tennis inelnaah category chi hrang 9 a awm a, players inkhel tura register an vaiin 267 awmin department 29 an chhuak.

Shooting-ah inelna chi hrang pahnih Air Pistol leh Air Rifle a awm a, Air Pistol bikah department 14 atangin shooter 42, Air Rifle-ah department 15 atangin shooter 45 an tel a. Shooting inelna hi kumin atanga telh thar a ni.

Chinese Checker-ah department 12 atangin singles inelnaah players 59, team-ah 20 chhuakin hei hi hmeichhe pual inelna a ni  bawk.

Chess inelnaah department 32 atangin team 22 an tel a, mens-ah players 54, above 55 years-ah players 8, above 50 years-ah players 24 an tel. Carrom-ah hian department 31 atangin players 327 an tel.

Mizoram Civil Services Sports & Cultural Association Annual Sports Meet 2017 hi Sept.15-ah zawhfel tura ruahman a ni.

Attachment

  • Loading attachment...