Vawiin khan LADC Hall, Lawngtlaiah sumdawn thiam pawimawhzia zir hona (entrepreneurship awareness programme) buatsaih a ni a. Commerce & Industries Commissioner/Secretary Pu Zothan Khuma'n a hmanpui.
Khuallian Pu Zothan Khuma chuan Mizoram sawrkarin New Economic Development Policy (NEDP) a duang a; chumi hnuaiah chuan mahni kham khawp thar maia duh tawk lo va, hralh suma chantir tham thar chhuaha siam chhuah tuma hma lak mek a ni, a ti a. Ram pum huapa sumdawn thiamna zirtir tur leh kaihruai turin Mizoram State Entrepreneurship Development Monitoring Committee (MEDMOC) chu din niin, chumi hmang chuan sumdawngte chawi kan a, sumdawng tur zirlai leh thalai a tam thei ang ber chher chhuah a tum a ni, a ti.
He hun hi Lawngtlai DC Dr A. Muthamma IAS chuan kaihruaiin, kal khawmte lawmna thu a sawi a. Mi tinin sawrkar hna kan thawk vek thei lo va; mahni kea ding turin sumdawn thiamna kan neih a, rilru nei taka hma kan lak a tul a ni, a ti.
UNDP Programme Co-ordinator Pu Rinzuala Ralte, MEDMOC Expert Member chuan sumdawn thiam pawimawhzia leh sumdawng tura thil tul hrang hrangte sawiin, mahni kea ding tura thiamna hrang hrang hman thiam dan a zirtir a. Bamboo Development Society, Lawngtlai ai awhin Pu Lalpianhuna pawhin thu a sawi.
Mizoram sawrkar hma laknain entrepreneurship awareness hi district khawpui tinah buatsaih a ni a. Lawngtlaia hun hmanah hian LADC Executive Secretary Pu H.Lalramenga te, sawrkar official te, Industries hnuaia NLUP leh PMEGP beneficiary te, sumdawng leh zirlai naupangte an kal khawm a. Lawngtlai District Industries Centre-a Functional Manager Pu C.Dokulha'n lawm thu sawiin hun a khar a ni.
