Pu Lalsawta, Minister, Planning & Programme Implementation chuan vawiin khan I &PR Conference Hall-a Seminar on Effect of Climate Change on Herpetofauna and Book Release inkhawm neih chu hmanpuiin Dr. H.T. Lalremsanga leh Dr. Samuel Lalronunga ziah ‘Mizoram Rul Chanchin’ lehkhabu a tlangzarh. Inkhawm hi State Climate Change Cell, Mizoram Science Technology & Innovation Council leh Bio-Diversity & Nature Conservation Network (BIOCONE) tangkawp buatsaih a ni.

Minister chuan kan pi leh pu thawnthu atanga Mizo mipuiin rul hlauh leh a theih phawt chuan a hmu apiangin thah ngei tur anga ngaih ngheh tlatna rilru chu paih daih a, a zir chiangtu te’n min hriattir an tum hriatsak hi a va pawimawh a tih thu sawiin, he lehkhabu  atang hian rul kan hmuh thin te, an hlauhawm leh hlauhawm loh te, tur nei an nih leh nih loh te kan hre thei dawn a. Rul kan hlauh leh huat avanga kan thah rem ngawtin nghawng tha lo a neih tam tak zinga pakhat chauh - sazu, uchang leh utawk lo puang vakin kan rama natna thar lam a thlen theih chungchang te hi mitin hriat atan a tha a tih thu a sawi. Zir thuk mi te’n an an ngaih pawimawh te hi mipui hian ngai pawimawh ila, chutichuan Mizo chhuan lo la awm zel tur te tana an khawvel tuna damlai te hian kan kutah a awm tih kan hriat chian theih nan he lehkhabu hi a pawimawh a ni a ti bawk. Hriat chian loh vanga ti tha inti taka rul kan thah hmiah hmiah zelin kan chan loh khan - khawvel sik leh sa danglamna leh natna thar lam dang a rawn thlen theih dan leh chumi vanga Mizoram ngei pawh a tuartu kan lo nih theih dan chu tun hnai mai kum hnih/khat lek chhunga kan ram ruah sur dan leh sik leh sa inthlak danglam maksak tak tak atang pawh hian a hriat theih a ni a ti bawk.

Mizoram University mithiam te, College hrang hranga mithiam te hian helaia lo pungkhawmte  hnena an sawi hian Mizoram a deng chhuak thei dawn si lova, chuvangin, he lehkhabu hmang hian Mizoram mipui ngaihdan thlaksak a, ngaihtuahna thar an neih theih ngei a beisei thu Minister chuan a sawi a ni.

Inkhawm hi Dr. R.K. Lallianthanga, Chief Scientific Officer in a kaihruai a, Dr. C.Vanlalramsanga, Secretary, Planning chu khual zahawm niin tunlai khawvelah sik leh sa inthlak dan zirchianna seminar neih chu lawmawm a tiin tangkai taka Mizo mipuiten an chhawr ngei a beisei thu a sawi.