Vawiin khan Lawngtlai District Water & Sanitation Committee (DWSC) chu an Chairman, Lawngtlai Bawrhsap Dr A. Muthamma IAS leh Co-Chairman, PHE Lunglei Circle SE Er H. Lalduhkima te hovin Lawngtlai DC Conference Hall-ah an thu khawm a. PHE Chief Engineer, SBM(G)-a Mission Director ni bawk  Er C. Lallunghnema chuan a telpui.

He hun kaihruaitu Lawngtlai DC chuan Lawngtlai District chu zun leh ek thlahdah awm lohna (open defecation free – ODF) district-a siam turin tih tur tam tak a la awm a, tuna hmachhawp awmte hi theih tawp chhuaha a hlawhtlin theih nana bawhzui a ngai a ni, a ti a. In tinin inthiarna tha leh tui thianghlim hnianghnar tak an neih a ngai a, khaw eng emaw zatah mipui tan public water point-ah te bual in leh inthiarna tur (sanitary complex) sak a la ngai a ni tiin, he meeting-a tel Swachh Bharat Mission (Gramin) kaihhnawih department leh tlawmngai pawl ai awhte chu theih tawpa tan la turin a sawm nghal a ni.

He hun hmanpuitu Er C. Lallunghnema chuan ODF ni tura hma laknaah India rama state-te zingah Mizoram chu 18-na niin, Mizorama district 8 zingah Lawngtlai District chu a mawngphahah a la awm tih sawiin, nasa zawka tan lak a ngai a ni, a ti a. ODF ni thei tura hmalakna chu department pakhat hma laknaa hlawhtling mai chi a ni lo va, tan rualna atanga a hlawhtlinna hmuh chi chauh a ni, a ti a. Member-te thawh hopuina a ngen rualin, India rama state 29 zingah state 5 chu ODF-a puan an ni tawh a, Mizoram chu 6-na nihpui tum ngei turin a sawm nghal bawk.

He thut khawmah hian member-te chuan hma lak dan tura rawtna an neihte an sawi ho va. District chhunga khaw kilkhawr leh hnufual zualte chu SBM(G) leh hmun dang atanga inthiarna in saksak ngawt piah lamah, a hman dan leh enkawl zui dan zirtir an ngai hle a ni tih te, zun leh ek thlahdah vanga hriselnain a tuar theih dan te pawh mipui hnena zirtir tel zel a tul thu te an sawi ho va. Hemi chungchangah hian Lawngtlai WATSAN Division PHE hnuaia SBM(G) chuan a tah tawlin khaw hrang hrangah mipui zirtira an zin kual mek thu an sawi a ni.

Lawngtlai District chhungah hian SBM(G) hnuaiah tun thlengin ek in 1974 sak tawh a ni a; sak lai mek 162 a awm bawk. Kum 2017-18 chhung hian ek in (IHHL) 4000 sak hman tum a ni. SBM(G) hma lakna hnuaiah hian District chhunga khaw 149 chu ODF-ah an inpuang tawh a ni.