Vawiin khan State Geological Programming Board (SGPB) Meeting vawi 22-na chu Aijal Club-ah neih a ni.

Meeting-ah hian Directorate of Geology and Mineral Resources (DG&MR) hnathawh  leh hmalakna te thlirhona neih a ni a. Department dang leh Mizoram chhunga hnathawka awm mek  state pawn lam  Agency-te nena thawhhona tha zawk a awm theihna atana hmalak zel dan tur te sawiho a ni a.  Chak zawk leh mumal zawka thawhhona neih a nih theihna tura inrawnkhawmna leh inhrilhfiahna  te neih a ni a. Meeting-ah hian technical thil leh inrelbawlna lama thutlukna te pawh siam a ni.

Kumin SGPB Meeting-ah hian a hnuaia tarlan Agenda te hi ngaihtuahho a ni:

1. Tuialhthei zawn leh laihchhuah kawnga hmalak zel dan tur.
2. ONGC in Mizorama  hna a thawh tawhte, thawh mek leh thawh zel dan tur.
3. DGM leh GSI tangkawpin Serchhip leh a chheh vela leimin chungchang a zirchianna.

SGPB Meeting hi kum tin vawi khat neih thin a ni a. Meeting ah hian DG&MR in kum khat chhunga  hmalakna tur leh hmachhawp hrang hrang a duan lawkte zirchianna  leh kum hmasa lama hnathawhte thlirletna neih thin a ni.

Board Meeting-ah hian State Department pawn atangin Geological Survey Of India (NER), Oil India Limited (OIL), ONGC (Assam-Arakan Basin), Central Ground Water Board (NER), Indian Bureau of Mines (NE), Project Pushpak, Mizoram aiawhte an tel a. Heng bakah hian state chhung atangin Planning, PWD, Environment & Forest, PHE, Power & Electricity leh Mizoram University (Geology Dept) aiawhte pawh an tel a ni.

DG&MR,Mizoram hian nikum September atanga kumin August thla chhung khan leimin hmun 89-ah an endik a. In hmun hrang hrang 162-ah Geotechnical Study an nei  bawk a. Mineral venhimna kawngah pawh theihtawp chhuahin check gate 23  hmun hrang hrangah  siamin dan lo a Minor Mineral tawlhruk turte a veng thin a ni. Hemi hun chhung hian Mining permit  (Stone Quarry) thar 94  pechhuakin, permit 253 a tinung thar bawk a. Royalty tlingkhawm zat chu Rs 1,26,68,967 a ni a. DG&MR hian NEC project, ‘Delineation of Urban Development Zones with Special reference to landslide Risk and Slope Stability of Aizawl City’ tih chu a thawk mek bawk a ni.

Meeting hi Pu Lalhmachhuana, Director, DG&MR in a kaihruai a. Pu H.Lalbiakkima Jt. Director, DG&MR in lawmthu sawina hmangin meeting hi a khar a ni.