Swachh Bharat Mission (Gramin) hnuaia Swachh Sankalp se Swachh Siddhi district level essay and film competition buatsaiha Lawngtlai District atanga a ti tha thlan chhuahte hnenah vawiin khan Lawngtlai DC Conference Hall-ah lawmman sem a ni a. Lawngtlai Bawrhsap Dr Arun T. IAS chuan lawmmante hi a hlan a ni.

Bawrhsap Dr Arun T. chuan faina chu vawi leh khata tih thuta tawpsan leh mai chi ni lovin, chhunzawm chhoh zel chi a ni, a ti a. Sawrkar kut chauh ni lovin, mi zawng zawng tel vena tur a ni, a ti. Faina kawnga inelna buatsaih chu a lawmman mai piah lamah inbuatsaihna kawngah pawh kawng tam takah hlawkna a ni, a ti a. He inelnaa telte’n an ngaihdan an tarlante chu District-in faina beihpui a thlakna kawng leh zun leh ek thlahdah awm lohna (ODF) district ni tura hma lakna kawngah hman tangkai tum a nih tur thu a sawi.

He intihsiaknaah hian “What can I do for a clean India (India ram fai nan eng nge ka tih theih ang)” tih hmangin essay leh “My contribution towards making India clean (India ram faina atana ka thawh vete)” tih hmangin film tawi siam inelna buatsaih a ni a. Mi 28-in essay theh lutin, mi 6-in film tawi hi an siam a. He’ng atang hian a ti tha pathumna thleng thlan chhuah niin, district level intihsiakna lawmman hlan an nih bakah state level competition-a thlit fim leh turin an essay leh film te hi thawn phei a ni ang.

He competition-ah hian essay huangah pakhatna H. Lalmuansanga (Lawngtlai Vengpui) niin, pahnihna CMS Dawngzuala (Downtown English School) leh pathumna Lalhlimpuii (Jehova Jire English School) te an ni a. Film tawi siamah pakhatna H. Lalsawmkima (Lawngtlai Vengpui), pahnihna Ryan Saihmingmawia Sailo & Lalchhanhima (Downtown English School) leh pathumna B. Lalthazova Group TKP (Lawngtlai Vengpui) te an ni.