4654/2024-2025

Lawngtlai, 15th March 2025 : Lawngtlai District Consumer Protection Council (DCPC) bultumin vawiin khan ' World Consumer Rights Day 2025' chu DC Conference Hall- ah hman a ni a. Pi Margaret J. Vanlalremmawii, SDO ( Sadar) chuan khuallian niin a hmanpui.

Pi Margaret J. Vanlalremmawii chuan kalkhawmte hnena lawmthu sawina a nei hmasa a. Consumer hian Mimal, Khawtlang leh Sawrkar a huam vek tih tarlangin, consumer- te dikna chanvo hriat leh humhalh hi mitin tihmakmawh a ni, a ti. SDO (S) chuan khawvel changkanna karah duh leh mamawh a danglam chak em em a, dam khawchhuahna tura pawimawh bakah thil dang tam tak lei leh hralh a ni fo tiin,  hetiang karah hian thil lei leh hralh kawngah fimkhur zual a tul hle a ti.

Pi Margaret J. Vanlalremmawii chuan tunlai chhanah internet kaltlanga thil lei leh zuar a tam hle a, a bik takin online shopping kaltlanga inbumna a hluar zual nia ahriat thu tarlangin, hemi kawnga  fimkhur thar turin a sawm a.  Internet kaltlanga thil lei leh hralh hi khawvel changkannain a ken tel tlat,  do mai teih a ni  lo a, a tha zawng leh fimkhur zawka hmang turin rilru lam siamrem a tul zawk a ni, a ti. Sustainable Lifestyle - pawimawhna sawiin SDO ( S) chuan ei leh bar kawngah mamawh chin hriat chian a tul bakah hmasawnna hnathawh kawngah environment tichhe lo zawnga hmalak a tul a, hei hian khawtlang chhenfakawm zawk a siam thei dawn a ni, a ti. Nundan leh tih phung tlo zawk nei tura danglam ngam tura mamawh bak lei lo tur leh bawlhhlawh sawngbawl  kawnga fimkhur turin   lawngtlai mipuite a fuih a. Thil lei leh hralh kawnga Lawngtlai mipuite fimkhur thar  tura chahin, Pi Margaret J. Vanlalremmawii chuan consumer- te tan District Consumer Protection Association - an awm reng tih tarlangin, mipuite an harsatna thlen thin turin a sawm bawk.

Pu C. Larinfela, Deputy Chief Legal Aid Counsel, chuan 'A just Transition to Sustainable Lifestyle ' tih thupui hmangin kalkhawmte hnenah zirtirna a pe a. District Consumer Protection Association hruaitute  leh kalkhawmte atang a  thusawina hun leh sawihona hun hman  a ni bawk.

Vawiin 'World Consumer Rights Day 2025' hmannaah hian District Consumer Protection Association, Merchant Association leh sawrkar official bakah NGO aiawhte an tel kim tha hle a, Pi Vanlalhlupuii, President, District Consumer Protection Association- chuan inkhawm hi  kaihruaiin, Pu Lal Rinsanga, DCSO, chuan lawmthu sawina neiin hun a khar. World Consumer Rights Day-  hi kum tin thupui thlan bik neiin March ni- 15 ah hman thin a ni a, kumin thupui atan hian ' A Just Transition to Sustainable Lifestyle ' thlan a ni.