Tukin (19.08.2016) zing dar 7 khan District Education Office, Lawngtlai bul tumin Lawngtlaia sikul naupangte'n India ram zalenna ni (Independence Day) puala zalenna kawng zawh (Freedom Run) an nei a. Lawngtlaia sikul hrang hrang atangin zirlai 500 chuang an thawk chhuak.

Freedom Run hawnna DC office tuala neih chu Lawngtlai DC Dr A. Muthamma chuan hmanpuiin, zirlai kal khawmte fuihna thu chah a sawi a. Boruak muanawm leh zalen tak hnuaia pianga sei liante tan chuan zalenna awmzia leh hlutzia hriat thiam a har thu sawiin, zalenna sual chhuaktu hnam pasalthate chuan zah leh chawimawi an phu hle a ni, a ti a. Chu'ng mi ropui tak tak tia kan sawite pawh chu tu mah ropui sa leh thiltithei bika piang an awm lo va, mi ropui ni tura inzir chhuak ve vek an ni tiin, tuna zirlaite pawhin anmahni ang ni turin theihna leh hun remchang an nei vek tih a sawi.

Zirlaite chu ram leh hnam tana tangkai tuma inzir tura chahin, DC chuan ram hmel timawitu leh hmasawnna thlentu an ni thei tih hre reng a, an theihna apiangah ram leh khawtlang rawngbawlna lama inhmang ve turin a fuih a. Zirlaite chu zalenna chhawm nungtu leh remna leh muanna vawng himtu ni tlat turin a sawm nghal.

Hemi hnu hian DC chuan Freedom Run-a telte chu a vai liam a. Zirlaite hian DC office tual atang hian Lawngtlai Bazar venga Areopagy thleng kawng an zawh a. Areopagy-ah hian Lawngtlai DEO Pu Lalzuiliana hovin kharna inkhawm tawi buatsaih leh a ni bawk.

Tukina zalenna kawng zawhah hian Lawngtlaia sikul 17 - Govt Region HSS, Govt Region H/S, Govt Southern Public H/S, Govt College Veng H/S, Govt Lairam H/S, Downtown English School, Don Bosco School, South Heath Academy, Ngurnunsangi English School, Jehova Jireh HSS, ML Junior English School, Southern Standard M/S, Rosebud M/S, Govt Model English School, Govt Electric M/S, Govt Chandmary M/S leh Govt Bazar M/S atangin zirlai leh zirtirtu thahnem tak an tel a. DEO, DPC (SSA) leh LADC EO (M) office-a thawktu eng emaw zat an tel bawk.