Tukin zing khan Mamit-ah “FREEDOM 70” hun hman a ni a. Mamit khawpui chhunga Zirlaite’n kawngzawhna neiin,Pi Lalbiaksangi, Deputy Commissioner,Mamit-in a hmanpui.

Pi Lalbiaksangi, Distict Bawrhsap chuan Zalenna neih pawimawhzia sawiin, ram buai tamtak khawvelah an awm a, chung rama chengte a biktakin naupangte’n harsatna tam tak an tawk mek a, tharum thawhna avangin mi tamtakin an kut leh ke an chan a, an nu leh pate an chan bawk a ni. Keini erawh chu kut leh ke kimin, kan in lumah nu leh pa karah zalen takin hun kan hmang thei hi a hlu em em a. Hengte hian zalenna hlutzia min hriattir nawn leh sela. Zalenna a awm zel theih nan theih tawp chhuah tlang zel ang u tiin naupangte a sawm a ni.

He hunah hian Mamit khawpui chhunga Zirlai naupang te’n chhim leh hmar atangin kawngzawhna an neia, hmar lamah Dinthar kawn atanga zawh tanin Pu H.Lianzela President, Mamit Officers’ Club chuan a vai liam a, chhim lamah Field veng atanga zawh tan niin Pu Lalropuia Hmar Vice President, Mamit Officers’ Club chuan a vai liam bawk. Kawngzawhte hi Bazar vengah intawk khawmin function tawi hman a ni a, hnam hla sak niin, thutiamna ( pledge) neih a ni bawk. He hun hi Pu Micky Lalenkawla, DPC , Mamit-in kaihruaiin, Pi R.Lalnunthari DEO, Mamit-in lawmthu sawina a nei a ni.