Nimin khan Lawngtlai District Health Department chuan Lawngtlai DC Conference Hall-ah zenghri danna pek chungchang zir hona (district level orientation workshop on IPPI) an buatsaih.
He hun hi Lawngtlai District Immunisation Officer Dr S.Thaizi chuan a kaihruai a. Lawngtlai Chief Medical Officer Dr Thani Pachuau chuan thuhma sawiin, kum 1962-a Mizorama hri danna pek hmasak ber BCG pek atanga tun thleng hian hri venna kawngah Mizoram chuan nasa takin hma a sawn a ni, a ti a. Zawnghri (smallpox) phei chu hriat tur pawh a awm tawh lo a ni, a ti. Lawngtlai District chhunga zenghri titawp a, mellung phun ngei tura theihtawp chhuah turin thawktu kal khawmte a fuih bawk.
Senior Medical Officer (World Health Organisation) Dr Lalhlimpuii chuan kal khawmte hnenah powerpoint presentation hmangin zirtirna a pe a. Khawvel huapa zenghri danna kalpui a nih dan te sawiin, Mizoram chhunga district hrang hrangte hna thawh tawh dan a tarlang a. Tun dinhmuna zenghri danna kalpui mekah Lawngtlai District chu a ti tha berte zinga a tel thu a sawi bawk.
He workshop hi January ni 31 atanga zenghri danna beihpui thawh khatna neih tur atana inbuatsaihna leh chumi atana hriat tur pawimawh inzirtirna hun atan hman a ni a. He hunah hian Lawngtlai District chhunga medical officer te, community health officer te, health supervisor te leh sub-centre tina health worker te an kal khawm a ni.
