Mizoram Legislative Assembly hnuaia Subject Committee-II chuan vawiin zing dar 7.30 atang khan Fishery Department leh Local Administration Department hnathawhte a hmunah an enfiah a. He Subject Committee – II ah hian Pu T.T. Zothansanga, MLA chu Chairman a ni a, Brig. T. Sailo, MLA, Pu C. Ramhluna MLA leh Pu RL Pianmawia MLA te chu member an ni a; Brig. T. Sailo MLA erawh chu rokhawlhna avangin vawiin programme-ah hian a tel ve thei lo a ni.

Tukin zing dar 7.30 khan Fishery Department enkawl lai Cold Storage,                             Bawngkawn chu tlawh hmasa berin, he hmuna sangha zuartute mamawh atana vur tlang lian an siamna khawlte an enfiah a. Heng khawl pathumte hi nikum December 21 vel atanga a chhiat avangin tunah hian hna thawk lovin a awm a; Department hotute chuan vur tlang siamna khawl a chhiat avanga sanghaa sumdawngte leh sangha dil neituten harsatna an tawh dante Subject Committee member-te hi an hrilhfiah a ni. He hmunah vek hian sangha zawrhna hmun Kiosk hawn a ni bawk. Fishery Department chuan hetiang cold storage hi Kolasib leh Bilkhawthlir-ah te an bun a ni.

Subject Committee-II hian Lengpui khuaa Kaikuang lian chi tihkeuna (prawn hatchery) leh sangha chi siamna (fish seed farm) te chipchiar takin an fang zui a. kaikuang lian hi Mizoram-a uar lehzuala khawi a nih theihna turin Central Institute of Fisheries Education (CIFE) Mumbai bultumin Fishery Department chuan Lengpui-ah hian a chi tihkeuna tur a bun mek a. Tripura atangin scientist-ten laboratory an rawn bunfelsak thuai dawn a, July thla atanga Kaikuang lian chi hi khawi tura a chi semchhuah theih an inbeisei a ni. He kaikuang lian chi tihkeuna hmun atang hian kaikuang chi pakhat pawisa 40 senga tharchhuah theih beisei a ni a; kum tin nuai 3-4 vel tharchhuak thei tura duan a ni a; dil neitute hnenah training pein a chi hi hralhchhuah thin a ni ang.

Subject Committee-II hian Sangha chi siamna hmunte pawh an enfiah a; he fish seed farm atang hian kum tin sangha chi nuai 4 vel an thar a; heng sangha chite hi sangha dil neite hnenah zaa 50 zela a man tlawmin an pe chhuak thin a; tunlai tak hian common carp an tuitir mek a ni.

Hemi hnu hian Lengpui-a Local Administration Department enkawl lai LAD Park chu Subject Committee –II member-te hian an tlawh a; LAD hotute nen he park tihchangtlun dan turte leh an harsatna tawh mekte chipchiar takin an sawiho a ni. LAD Park hi kum 2005 atang khan bul tan a ni a; September 2008 atang khan vantlang hman theih tura peihfelin, ni khat hman man Rs 2000 a ni.

Subject Committee-II hian vawiina an hmun tlawh chungchangah review meeting neiin, an thil hmuh leh rawtnate a hranpain Mizoram Legislative Assembly-ah an thehlut dawn a ni. Chairman Pu T.T. Zothansanga chuan, “Keini Committee hian Department 8 enfiah hna kan thawk dawn a. Department tam takin hna tha tak tak an thawk tih kan hria a, hengte hi Legislative Assembly aiawhin member-ten a taka hmuhpui a, an harsatnate ngaihthlaksak hi kan tum a ni” a ti.