Vawiin khan Minister Pu Robert Romawia Royte, Aizawl East-II Bialtu ni bawk chuan a bial chhunga Tuithiang leh Bethlehem Vengthlang inkal pawhna Bridge leh Slab Culvert siam thar chu ribbon chep chatin a hawng.

He Lei hawnna inkhawm tawi hi Tuithiang Veng Local Council Chairman Pu R.Lalthlamuana'n kaihruaiin PWD E.E Pi Jenny Malsawmdawnglian'in technical report a pe a. Helai hmuna lei awmsa hi a chak tawk loh avang leh a hlui tawh avangin motor lian bungraw phur zawh theih turin PWD hmalaknain kumin March thla atang khan Lei thar siam tan niin, he Lei thar hi feet 42.64-a thui, feet 16.4-a zau, feet 1.50-a chhah, M 25-a chak tura ruahman chu M31-a chak tura Rs. 40 lakhs senga thawh zawh a ni. Tin, Slab Culvert hi 9.8 ft-a thui, 16.4 ft-a zau, Rs. 30 lakhs senga siam a ni. He kawng hi a bikin Aizawl chhuah lama chengte tana inkal pawhna kawng pawimawh tak a ni. Bethlehem Vengthlang Local Council Chairman Pu Kapzauva pawhin bialtu MLA chak tak hmalakna lawmawm a tih thu tawi a sawi bawk.

Inkhawm tawiah hian Pu Robert Romawia Royte chuan thusawiin,  Chief Minister zahawm tak Pu Zoramthanga birth day ni taka Aizawl East-II area-a mipuite tana kawng pawimawh lei thar hawn a ni chu lawmawm a ti a, CM birthday lawmpuina leh duhsakna Pu Robert Romawia Royte chuan a hlan nghal a ni. Tun sorkar hun rei lote chhunga Aizawl East-II area-a hmasawnna hna hrang hrang thawhte tar langin, heng hnathawhna tura  CM duhsakna  leh department-a thawktute leh bial chhung mipuite tawiawmnaah lawmthu a sawi a. Minister chuan inthlan dawna Bial hmasawnna tura manifesto-a a lo neihte a tahtawla tihhlawhtlin chhoh mek a ni chu lawmawm a ti a. Kan hruaitu lu ber CM leh kan sorkar hian kan sawi chu kan ti zel thin a, kan la ti zel dawn bawk a ni a ti. Tuithiang Veng leh Chhinga Vengthlang inkal pawhna kawng (bridge) cheng nuai tam tak senga thawh tur pawh lungphum leh hna tan thuai tura tihfel mek a nih thu a sawi bawk.

Lei hawnna hun hman zawh hian Minister hian Armed Veng South, Tuithiang Veng, Chite Veng, Bethlehem Veng, College Veng te intawm Bethlehem Vengthlanga Police Beat Office a tlawh a. Chubakah Armed Veng South thlanmual bula cheng nuai 14 chuang senga kawng siamthat hnathawh mek a tlawh bawk.

Minister hi Bial chhung khawtlang hruaitu, NGOs hruaitu leh mipuiten an tawiawm a ni.