4901/2025-2026

Dated Aizawl, 18th March 2026 : Directorate of Information & Public Relations, Government of Mizoram leh National Film Development Corporation (NFDC), Ministry of Information & Broadcasting tangkawpin an buatsaih ‘LEMCHAN – Mizoram Film Festival 2026’ neih mekah vawiin khan Co-Festival Director Pu Pratap Chhetri kaihruaiin lemchan lama India hmarchhak state-te dinhmun leh hma sawnna tur hrang hrangte sawi hona, I&PR Mini Theatre, Lianchhari Run-ah neih a ni a, he hunah hian Northeast state hrang hrang atangin filmmaker lar Oinam Doren (Arunachal Pradesh), Alexander Leo Pou (Manipur), Napoleon RZ Thanga (Mizoram), Kivini Shohe (Nagaland), Chow Partha Borgohain (Assam), Biplab Goswami (Tripura), leh Gospel Ramdinmawia (Lersia Play) te an tel a ni.

Vawiin hun hmannaah hian Northeast-a film siamtute harsatna tawh thin hrang hrangte sawi ho niin, hmarchhak state-a film Industry-te than lenna tur hrang hrangte sawi ho a ni a, thawh hona tha lehzual neih dan tur te, Central sawrkara film lam tih hmasawn nana thawktu, Ministry of Information & Broadcasting atanga sum tam lehzual hai chhuah a nih theih dan tur te, zau zawka film theh darh a nih theih dan tur te, National Film Festival-ah hmarchhak state tinte tana film tam zawk chhuah a nih ve theih dan turte leh NFDC pawhin nasa zawka North East film-te chawi san a nih theih nana hma lak zel dan turte sawi ho a ni.

March ni 16 atanga neih tan he Lemachan-Mizoram Film Festival-ah hian Bollywood leh NFDC mite bakah, a vawi khatna atan hmarchhak state hrang hrang atangin, Film lama ram pum huapa sulhnu tha tak tak neite an kalkhawm a. Film hmasawnna tur hrang hrangte zirna leh sawi hona hunte hman niin, thenawm state-te leh Mizoram kutchhuak feature film, documentary leh short film 22 chuang chhuah a ni bawk a; vawiin tlai hian tunlaia lar tak Tribeni Rai-i film siam ‘Shape of Momo’ tih chu Mini-Theatre-ah chhuahin, Festival hi khar a ni dawn a ni.