“Lemziak hi kan ram leh hnam humhalhna leh chawisanna hmanrua a ni a; Mizo hian  hnam ziarang mawi tak leh chhuantham kan nei a, hengte hi lemziak-thiamten uar taka min phochhuahsak hian kan ram leh hnam a chawimawi a, kan zahawm phah thin a ni” Pu PC Zoramsangliana chuan a ti.

Vawiin chawhma dar 11.00 khan  Aizawl Art Gallery leh Art Novelty tangkawpina an buatsaih A Group Exhibition of Paintings – 2011 chu Aijal Club-ah Art & Culture Minister Pu PC Zoramsangliana chuan a hawng a ni. Minister chuan, “Thangtharte zinga lemziak hmanga eizawng leh hetiang lam thiamna zirbing mek kan pung chho zel hian kan hnam a tihausa sawt a; Mizoram University-a fine arts zirna telh ve hial dan tur pawh sawrkar chuan a ngaihtuah a ni. Lemziakmite suangtuahna ril tak a lema kan hmuh thin hian ngaihtuahzui tur thil tam tak rilru chhungrilah min pe a, kan nunah thuchah ropui tak a hnutchhiah thin a ni” a ti.

Pu PC Zoramsangliana chuan lemziak mai bakah milim ker lamah pawh hmabak kan ngahzia thu sawiin, “Thangtharte rilrua hnam hmangaihna rilru chawk tho tura Vanapa Hall tuala kan pasaltha chhuanvawr Vanapa lim tun te; Khuangchera ruang tlukna Changsilkai-a a lim tun te; Indian Museum-a Mizo nu leh pa lim dah te bakah pipute sulhnu uluk lehzuala humhalhte chu kan hmachhawp zingah a tel a ni” a ti. Mizo pipute sulhnu leh kan hnam chanchin rintlaka chhinchhiah a pawimawh thu sawiin, Minister chuan, “Pipute sulhnu leh chanchin humhalh leh thehdarh tura sawrkarin ke a pen mek lain, a hmunhma neitu nih inchuhna leh chanchin dik zawk chungthua inhnialna awm thin hian min titim thin a ni” a ti bawk
    
Art&Culture Minister chuan, “Cheraw hmanga khawvel record kan siam khan nasa takin Mizo hnam leh kan incheinate khawvel-ah a puangzar a; Commonwealth Games, New delhi-a neih tumah pawh khan India ram aiawhte hmahruaitu chuan Mizo hmeichhe thuam a inbel a ni. Chuvangin, Mizo hmeichhiate Mizo-na phochhuaktu chu puanbih hi a ni a; kekawrtlawn leh incheina dangte inbel thin mah ila, puanbih bawk hi hnam dangte laka kan hmeichhiate thliarhrangtu a nih avangin uar sauh sauh a tul a ni” a ti.Kum 2012 Chapchar Kut-a Indian Musuem nena tangkawpa exhibition ropui tak buatsaih a nih tur thu pawh Minister hian a sawi lang bawk.

September 10-17 chhung awh tur A Group Exhibition of Painting-2011 hi lemziakthiam mi 4 – Pu Laltanpuia, Art Gallery neitu te, Pi lalhmingmawii (Amoii), Art Novelty neitu te; Saitluanga Sailo leh Zaithanmawia Varte, Creative art Instructor v eve te tanghovina an buatsaih a ni a. Lemziak chi hrang mawi tak tak 95 zet phochhuah a ni a; Aijal Club chhawng 2-naah zing dar 10 atanga zan dar 9 thleng a duh apiang tan a thlawnin a en theih a ni. Lemziakte hi oil, acrylic leh water colour hmanga ziakte a ni a; a lei duh tan a lei theih bawk a ni.

Art Exhibition hawnna inkhawm hi Pu Rosiamliana Ralte, Member, Governing Body, NEZCC chuan a kaihruai a; mipuite chu ram ralmuang kan nihzia entirnan zan hun thawla exhibition tlawh thin turin a sawm a ni.