Urban Development & Poverty Alleviation Department (UD&PA) leh Lengpui Branch YMA tangkawp buatsaihin Lengpui Airport-ah ‘Clean My Airport’ Programme hman a ni a. Lengpui Branch YMA member-te bakah High School leh Middle School zirlaiten Airport leh a chhehvel thenfai hnatlang an nei.

Programme hawnna inkhawm tawi Lengpui Airport parking lot-a neih chu Lengpui Branch YMA President, Pu Lalhmasaa Ralte-in a kaihruai a. UD&PA Department-a Joint Director, Pu HVL Zarzoenga chuan kalkhawmte lawmna thu leh ‘Clean My Airport’ thiltumte bakah Swatch Bharat Mission (Urban) hnuaia UD&PA Department hmalakna hrang hrangte a sawi a. Lengpui Airport chu Mizoram kawtchhuah pawimawh tak a ni tih sawiin Pu Zara chuan, Lengpui khawtlang mipuite thawhrimna leh inpekna vangin Airport fai tak kan nei dawn a ni a ti a. Lengpui khawtlang mipuite chu Airport vawnfai kawngah sawrkar hmalakna piahlamah pawh theihtawp chhuaha hma la chhunzawm zel turin a ngen nghal bawk.

Swatch Bharat Mission (Urban) hlawhtlin nan Students Self-support Union leh NGO hrang hrangte nen thawhhona thuthlung ziah tawh niin mipuite zirtirna hmanrua atan Inter-College Quiz Competition-te neih a ni tawh bawk.

He hunah hian kalkhawm zawng zawngte chuan Faina ngaipawimawh tur leh chumi atana hun pe tur te, bawlhhlawh paih mai mai lo turte leh midangte zirtir chhawng ve zel tura intiamin ‘Clean India Thutiam’ an sawi rual a ni.

Lengpui Airport-ah hian bawlhhlawhbawm thar 20 dah belh a nih bakah Airport vawngfai tura inzirtirna thuziakte tar a ni a. Hnatlang zawng zawngte hnenah Clean My Airport puala siam t-shirt sem a ni bawk. Lengpui Branch YMA Secretary, Pu David Lalnunmawia’n lawmthu sawiin hun a khar a ni.

Clean My Airport programme-ah hian UD&PA department staff, mi 30 leh Lengpui YMA leh zirna school aiawh mi 180 lai an tel a ni.