Vawiin khan Mizoram Judo Association (MJA) Headquarters buatsaihin Federation Cup National Team Champion lawmna chu TNT, Muanna Veng, Aizawlah hman a ni a. Parliamentary Secretary Pu Hmingdailova Khiangte-in a hmanpui.

Khuallian Pu Hmingdailova Khiangte chuan national champion ni thei tura an naute an phurpuina leh tuipuinaah Mizoram Judo Association hruaitute chu fakin, an thawhrimna zarah Mizoramin Judo-ah hma a sawn zel a ni a ti a. Heti anga hlawhtlinna chang tur hian player-te leh anmahni kaihruaitute an pawimawh ve ve a ni tiin, kan State ralmuanna hi chhawr tangkai a, hlawhtlinna ropui zawk chang zel thei tura tan la sauh sauh turin player-te a fuih bawk.

Khuallian chuan National Judo Champion team player leh official-te hnenah hian chawimawina thilpek a hlan nghal bawk.

Lawmna inkhawm hi Dr KVL Rochharzela, MJA President-in a kaihruai a. Pu C.Laltlanthanga, Secretary, Mizoram State Sports Council & MJA patron ni bawk leh Pu C.Dosavunga, 5th Dan Karate Black Belt te pawhin thu an sawi.

National Judo Team Championship 2016 (Federation Cup) hi Shillong, Meghalaya-ah January 26-28, 2016 chhung khan neih a ni a. Hmeichhiaah Mizoram Judo Women Team chu champion an ni. Mizoram Judo team member-te chu:

Judo Players-

1) Below 48 kgs : Lalnilawmi, Champhai;

2) Below 52 kgs : Lalhumhimi, Zemabawk North;

3) Below 57 kgs : R.Vanrammawii, Zemabawk North;

4) Below 63 kgs : ZD Lalnuntluangi, Muallungthu;

5) Above 63 kgs : Lalthazuali, Lunglei.

Team Officials-

1) Dominic Lalremsiama, Chaltlang, Team Manager;

2) Madhu, Dinthar, Coach.