Tukin zingkar atangin Rajiv Gandhi Stadium, Mualpui, Aizawlah Sipai Lak Runpui neih chhunzawm leh a ni a. Nimin lama Physical Test a tling tawhten Medical Test an neih bakah Mizo thalai 1500 rual zetin tukin khan Physical Test an neih leh a ni.

Aizawla Army Recruiting Office Director, Col. Sameer Sharma, chuan Mizo thalaite chu duhsak bik an ni tih sawiin dilna pawh internet kaltlanga online registration hmanga tih lawk vek tawh tur a nih laiin Mizoram sawrkar ngenna avangin registration ti ve lote pawh tun tum atan chauh ngaihnathiam an ni a ti a. Ramchhung hmundangah chuan General Duty atan pawl sawm zirlai atanga zawhna siam a nih laiin Mizoramah chuan pawl riat zirlai atang chauh a siam a ni a, Clerk leh Technical hnuai lut turte tan pawh ramchhung hmundanga pawl sawmpahnih zirlai atanga zawhna an siam thin chu Mizoramah chuan pawl sawm zirlai hmanga siam a nih tur thu a tarlang bawk. Col. Sameer chuan Mizoram Youth Commission Chairman, Pu T. Sangkunga thahnemngaihna leh a phurpuinaah lawmthu sawiin Mizo thalaite tan malsawmna a ni a ti a. 3^rd Bn. MAP-te, Sainik Welfare & Resettlement Office-te, Ex-Servicemen-te leh NCC-ten an tawiawm avangin lawmthu sawiin Mizo thalaite tan bik a nih avangin sawrkar department hrang hrangte leh ram hruaitute chu phurpui lehzual turin a sawm bawk.

Tun tum sipai lakna hi dik leh langtlang taka kalpui a ni a. Diltu zawng zawngte chu Bioimetric Registration tih tir an nih avangin diklo taka thil tih tumte chu awlsam taka man chhuah theih an ni dawn a ni. Aizawla Army Recruiting Office-te puiturinSilchar Army Recruiting Office atangin Col. C.S. Bandale-a leh a hote bakah Jorhat atangin team khat an lo kal bawk.

Sipai hotute chuan sipai hna dil nan hian sum sen a ngai lova, hlawh tha tak leh hamthatna tam tak nei a nih avangin Mizo thalaite chu India sipai-a lut uar lehzual turin an sawm a. Sipaia luh tum te chu hriselna ngaipawimawh tur leh taksa peng pawimawh laia tattoo nei lo turin an chah bawk. Sipaia lut duhte chu www.indianarmy.nic.in ah in register tur a ni a, hrechiang duh leh harsatna neite chuan Aizawla Army Recruiting Office Ph. No. 0389-2351166 ah zawhfiah theih reng a ni bawk.