Health Department buatsaihin vawiin khan I&PR Auditorium-ah Health Minister Pu Lal Thanzara hovin World Leprosy Eradication Day puala hun hman a ni.
Pu Lal Thanzara chuan Mizoramah phar natna vei an tlem a, phar natna avanga piangsual, rualbanlo leh thi an awm hriat a ni lo chu thawktuten phar an hmuhchhuah hma vang leh treatment a hun taka an pek vang a ni, a ti. National Leprosy Control Programme hnuaiah phar damdawi MDT hmangin phar natna veite hlawhtling taka enkawl niin, phar natna vei an tlahniam nasa a, Mizoram bikah phei chuan kum 2005 daih tawh khan mi 10,000 zingah phar natna vei pakhat aia tlem an awm tawh, Health Minister chuan a ti a. Chutihrual erawh chuan tun thlengin he natna vei enkawl ngai leh hmuhchhuah thar an la awm avangin tha thlah hauh lova tan lak chhunzawm zel a ngai a ni, a ti bawk.
Health Minister chuan Medical College neih thuai a nih theih nana sawrkar hmalak mek dan he hunah hian a tarlang a. Medical College atana ruahman Falkawn State Referral Hospital chu tihchangtlun hna thawh mek niin IMC duhdan anga a tlem berah khum 250 tal dah tum a ni, a ti. Tun hnai mai hian Doctor (Specialist) engemawzat Falkawna sawn an nih tur thu leh Nurse 25 lak belh tuma hmalak mek a nih thu a sawi a. Aizawl Civil Hospital aia hmanrua leh inenkawlna tha zawk leh changtlung zawka siam tum niin Aizawl Civil Hospital hi a facilities tihniam chuang si lova Referral Hospital dah pawimawh hmasak tum a nih thu Pu Lal Thanzara chuan a sawi bawk.
April 2014- March 2015 chhung khan Mizoramah phar hmuhchhuah thar 11, multibacillary (MB) 6 leh paucibacillary (PB) Case 5 an awm a, Lawngtlai ah pariat, Lungleiah pahnih, Saiha ah pakhat hmuhchhuah an ni. April 2015 atanga January 2016 thlengin phar hmuhchhuah thar pali - Lawngtlai ah 3 leh Lungleiah pakhat an awm a, multibacillary (MB) case pakhat leh paucibacillary (PB) Case pathum an ni.
World Leprosy Eradication Day programme hi Health Principal Director Dr.K.Ropari’n a kaihruai a. State Leprosy Officer Dr.Chawngthansiami leh Dermatologist Dr.Lalthlengliani ten powerpoint hmangin phar natna chungchang an zirtir a ni.
