Nimin khan Commerce & Industries hnuaia NLUP beneficiaries 43 te hnenah NLUP tanpuina 3rd phase sem a ni.

Semna inkhawm hi Zawlbuk Ngopa ah neih a ni a, Commerce & Industries Minister Pu H. Rohluna chuan khuallian niin hun a hmanpui a ni. Khuallian chuan sawrkar flagship Policy NLUP chu chhungkaw harsa zual ten lei rem an rah theih nana duan ni mahse mi tamtak rinawmlo leh a nih na tur ang taka tanpuina hmanglo an awm thin thu tarlangin chutiang mi te tan chuan hlawhtlinpui a harsat tur thu a sawi a, chutih laiin mi rinawm leh mi taima hlawhtling tamtak an awm thu a tarlang a ni. He huna NLUP tanpuina dawngtute chu rinawmna leh taihmakna nen tanpuina chu hmang tangkaia mahni chhungkua dinpui ngei turin a fuih bawk a ni.

Industries hnuaia khawl an sem te chu khawl tha tak tak annih bakah Commerce & Industries Department hnuaia NLUP kalpui  chu a that thu tarlangin a zirchiangtu pawh Mizoram University atanga mihtiam rual an nih thu a sawi bawk. Khuallian chuan NLUP hnuaia tanpuina te chu tualchhung mamawh phuhruk nan mai ni loin mi taima leh tumruh tan chuan tharchhuah leh dehchhuah hrang hrang atangin supplier tha tak a nih theih thu a sawia hnam intodelh kan nih theih nan chhungtin tan tan lak a pawimawh thu a sawi a ni.

Hemi bakah hian Sawrkar chuan kum kal mek 2017-18 ah hian NEDP hnuaiah cheng vbc 750 a dah thu tarlangin NEDP a sum dah chu mipui mamawh phuhruk nana hman tur niin hmasawnna ruhrel bakah khawl chi hrang hrang CT Scan khawl, Agriculture link road, Cold Storage leh warehouse bakah School Building thawmthat leh sak nan te pawha hman tur a nih thu a tarlang a ni. Lengteng bialtu ni bawk Pu H. Rohluna chuan Pawlrang leh Hliappui khua ah NEDP hnuaia kawng leh vantlang mamawh thildang siamtur rawtna te chu a hmunah kal in a tlawh bawka hemi chungchanga mamawh hrang hrang an neih te chu NEDP hnuaia Sawrkar in mipuite a puih tur thu a sawi a ni.

Pu R. Lalthazuala, Functional Manager, DIC Champhai in report a pek dan chuan Champhai District a Commerce & Industries hnuaia NLUP beneficiaries awm zawng zawng chu mi 2327 an nih thu tarlangin tun tuma beneficiaries 43 te hnenah hian Trade hrang hrang 19 ah cheng 12,74,000/- sem a nih thu a tarlang a ni. Trade 3 (Auto Rickshaw mi 10, Thingzai khawl mi 3 leh Puanthuina khawl mi 6 ) bikah 4th phase sem a nih tawh thu tarlangin hemi bakah hian Carpentry leh Tailoring ah hian tanpuina Sum Fai cheng 99,000 sem tel a nih thu a tarlang bawk. Trade dangah pawh 4th Phase sem thuai a nih tur thu a sawi a ni.

Minister hi Commerce & Industries Addl Director Pu C. Lalbiakthanga bakah District Industries Centre Champhai leh Dy DPC Champhai in an tawiawm a ni.