National Highway no. 6 (NH-6) Seling - Champhai road lamlian pawimawh tak hi Border Roads Organisation (BRO) hnuaia Project Pushpak enkawl reng thin a ni a. He kawng hi a pawimawh hle na chungin tun thlengin Single Lane District Road Standard a la ni reng a, BRO atangin zauh tura hmalakna a awm lo a ni.
India Sawrkar-in kalphung a thlak danglam avangin State hrang hranga National Highway-te chu State PWD emaw, National Highway Authority(NHAI) kuta pek a, BRO chu ramri hrul (border) a kawng sial leh enkawl tura a tih tak avangin Mizorama an Highway enkawl thin NH-54, Lailapur-Aizawl-Serchhip-Lunglei-Tuipang kawng pawh State PWD kutah 2010 khan an hlan tawh a. State danga an kawng enkawl pawh State PWD enkawl thei apiang hnenah an hlan chhawng bawk a.
Seling-Champhai kawng hi India Sawrkar chuan 4.3.2014 khan National Highway atana puangin Highway No.6 a pe a; 17.2.2015 khan Mizoram sawrkar enkawl turin a pe ta bawk a. Mahse a enkawl mektu BRO chuan State PWD-a hlan mai lovin kum 2 zet an kawl zui a. Chumi chhungin thuam that (resurfacing) a hun tawh hle nachungin an thuam tha ngai lova, kawng a lo chhe viau hman tawh a. Road Transport & Highway Ministry lamin an enkawlzui an phal tak loh avangin 31.3.2017 khan Mizoram PWD hnenah hlan a ni ta a; April 1, 2017 atang khan he kawng hi Mizoram PWD kutah a awm tan ta a ni.
BRO lamin an hlan hma pawhin State PWD chuan an enkawl tur ani ngei dawn tih hriain hma an lo la lawk a. Seling - Keifang leh Kawlkulh-Khawzawl inkar siamthatna tur estimate siamin Central atangin sanction an lo la sa diam a; tunah hian contractor-in hna a thawk tan tawh a. Seling-Keifang phei chu a chanve thuak an zo tawh a, khua a thal ve leh chhunzawm lehin thla 2 vel chhung chuan an zawh theih beisei a ni a. Kawlkulh-Khawzawl erawh chu a fel har deuh avangin alkatra hna an tan hman lova; khuar hnawh hna thawkin, thal leh chhung chuan zo tura beisei an ni bawk. Tunah hian lung herna khawl leh alkatra chhuanna khawl pawh Keifang daiah an bun fel vek tawh a ni.
Tun Sawrkar kum kal mek atan hian hmabak la awm, Keifang- Kawlkulh leh Khawzawl-Champhai thuam tha turin Highway Ministry-in budget dahin estimate pawh thehluh tawh a ni a; Central Sawrkar lamin an sanction hma theih chuan thal lehah chuan hna tan theih beisei a ni bawk a. Heng zawng zawng hi he kawng NH-6 hi Mizoram Sawrkar-in a kuta awm hma a lo inhmakhua avanga awm thei a ni zawk.
Kan hriat theuh angin March 5, 2017 atang khan furpui ang maia ruah a sur avangin, leimin nasa tak hmun tinah awmin, kawng chhuat nasa takin a chhia a. Kum dang zawng aia ruahtui tam avangin Champhai kawng hi nasa takin a lo chhe ta a. A enkawltu hmasa (BRO) ten a hunah thuam that (resurfacing) hna lo thawk se chuan hetiang vaka chhia hi chu nilo tura ngaih a ni a. Sawi tawh angin he kawng siamtha tur hian PWD-a inpeih hman lova, hun leh khaw thain a daih ngang lova; BRO hnen atang enkawl that loh leh chhe mai thei dinhmuna ding ro an khawm avang leh rin phak bak fur nasa avang a Champhai kawng lo chhe ta lutuk hi PWD chuan pawi a ti takzet a. He kawng hmangtu mipuite hriatthiamna ngenin, Mizoram PWD chuan Central lam atanga pawisa hmulo chung pawhin, a ba tala theih tawp chhuaha siamthat hna thawh zel an tum a ni. Hetihlai hian he kawng hi double lane turin DPR siam peih vek a ni tawh a. Land Acquisition tihfel hnuah tender chhuahin Contract 5-a thenin chak taka thawk turin hma lak mek a ni bawk.
