3714/2023-2024

7^th February, 2024 : Vawiin khan Mizoram LESDE Minister Pu Lalnghinglova Hmar leh sorkar laipuia Ministry of Skill Development and Entrepreneurship (MSDE) hotute chu an Secretary Pu Atul Kumar Tiwari hoin New Delhi-ah an inkawm a, skill development lama Mizoram hmasawnna tur an sawiho a, kum kal taa harsatna awmte chinfel dan an rel bawk.

Pu Lalnghinglova Hmar chuan Mizoramah sorkar thar piang chuan 'hand holding policy' kalpui a tumna kawngah MSDE ministry chu an innghahna tur a ni a, Chief Minister pawhin a ngai pawimawh hle a ni a ti a; MSDE Secretary nen an inkawm tawhna bawhzuia kal an nih thu a sawi.

Pu Atul Kumar Tiwari chuan Mizoramin hmasawn a tum tih a taka a lan thu leh hun inhnaih taka Minister-in tum hnih lai a office a tlawh chuan an ti tak tak tih a lantir thu sawiin, an theihna zawnah chuan Mizoram pui turin an tlanchhe loh tur thu a hrilh.

Darkar hnih vêl Mizoram chungchang bîk sawiho niin MSDE hnuaia sum tâng awm ang ang pek chhuah vek an tum a, sorkar kum a tawp hmaa tih tur hmanhmawhte sawi a ni bawk. Mizoram sorkara LESDE Department lamin hmachhawp an neih an thehluhte chu en fela tihhlawhtlin an tiam a, thil țhenkhatte erawh chu sorkar laipui kalphung nena her rem a tul thu an sawi.

He hunah hian LESDE Secretary Pu Lalramsanga Sailo leh Director Pi Angela Zothanpuii pawh an tel a; Ministry of Skill Development and Entrepreneurship hnuaia a hotu liante bakah Pi Trishaljit Sethi, Director General of Training leh National Skill Development Corporation CEO Pu Ved Mani Tiwari pawh an tel.