3715/2023-2024
LUNGLEI; the 7th February, 2024 : Prof. Lalnilawma, Minister of State for Public Health Engineering, Horticulture leh Rural Development Department chuan vawiin khan Lunglei tlawhin AMRUT 2.0 hnuaia Lunglei mipuiten thal laia tui kham khawp an neih theihna tura Tlawnglui khuah hmalâkna Pialthleng Pump House Complex a tlawh.
He tuikhuah hi cheng Vbch 4.77 man tura ruahman a ni a, tui litre nuai 240 khuap tling thei tura ruahman a ni. He hna hi hlawhtling taka zawh theih a nih chuan Lunglei mipui tân thâl lai pawhin tui kham khawp pump tur a awm theih tawh beisei a ni.
Minister hian Greater Lunglei Water Supply Scheme tihchangtlun zawkna tur atana ruahmanna hrang hrang hmachhawp awm Pump Line thlâk, Pump House leh khawl thar bun belh, fur tui nu ti thianghlim thei tura sawngbawlna siamthat, transformer thar bun belh leh khaw chhung Pipe Line Extention a tâna NESIDS Funding tûra Project siam te pawh a hmunah a en a, Special Central Assistant hnuaia Tlawnglui tui titam tura Check Dam siam mek, Court Case avanga chawlh lailawk pawh chin fel a nih theihna turin a hmunah a tlawh bawk.
Prof. Lalnilawma hian HATIM Complex chhunga Rain Water Harvesting tank siamsak tura an ngenna chu a hmunah a en a, PHED emaw Rural Development Department atanga siamsak dan ngaihhtuah a nih tur thu a sawi. Minister hian Rain Water Harvesting Tank, Pukpui hnathawh mek leh PHE Control Room te a tlawh bawk.
Minister hi HPC Vice Chairman Pu V. Malsawmtluanga, LMC Councillor, PHE Department-a Engineer-in Chief, SE PHED leh a hote bakah Project Save Tlawngte’n an tawiawm a ni.
