2804/2026-2027

24th October, 2026: India rama Living Museum hmasa ber leh awm chhun ni bawk, Art & Culture Department-in Zokhua (Mizo Typical Village), Falkawn-a chawlhkar tin Inrinni apianga an buatsaih Living Museum chuan kum khat a tling ta a. Vawiin khan I&PR Director Pi Mina Zoliani Joute, Art & Culture Deputy Secretary Pi Lalengvari leh official dang ten an tlawh.

Living Museum kum khat tlin pual hian cake zaina hun hman a ni a. Tourist helai hmun tlawhtute pawh a lawmna hun tawi buatsaihah hian an tel a ni.

Living Museum hi ram chhung leh ram pawn atangin tlawhtu an thahnemin ngaihhlut a hlawh hle a, a bikin ram pawn atanga lo kal Tourist ten an tlawh nasa hle. Zokhua, Falkawn (Mizo Typical Village) hi kum 1992 khan din fel a ni a. Mini Live Museum atana buatsaih niin hmanlai kan pipute hun laia Mizo Khua anga siam leh cheibawl a ni.

Kum 2011 khan a vawikhatna atan hmanlai Mizo nun ataka entirna - Live Demonstration of Mizo Typical Life hi neih niin a hming atan ‘Mizo Nun Kutpui’ tih a ni a. Kum 2023 khan India ramin G-20 Summit a thlen denchhenin Summit Palai te pual leh Chapchar Kut lawmna pakhat atan ni thum chhung Live Demonstration of Mizo Typical Life hi neih leh a ni a, a hming atan ‘Zonun Kutpui’ tih a ni a; kum 2024, 2025 leh 2026 khan Chapchar Kut pualin ni hnih chhung  hmanlai Mizo nun entirna hi buatsaih leh a ni tawh bawk.

Tunah hian thangthar leh naupang zawkte’n Mizo nun ze mawi leh chin dan hrang hrangte a tak ngeia an hmuh leh an tem chhin theih nan te, zirlai naupangte tana tangkai tur leh an zirlaibua awmte an hriatthiam lehzual theih nan te, khualzin lo pung zel ten kan hnam nun an hmuhfiah theihna turin Art & Culture Department chuan kartin Inrinni apiangin Hmanlai Mizo Nun Entirna - Living Museum hi October 25, 2025 Inrinni atang khan Living Museum hi a a buatsaih tan a. Tun thleng hian Living Museum tlawhtu hi mi 9600 an chuang tawh a, tlawhtu zinga a zatve zel hi rampawn atanga Mizoram rawn tlawhtu Tourist te an ni.

Living Museum hi Inrinni apiangin Entry Fee Rs. 200/- chawiin a  tlawh theih a; Government Middle School leh a hnuai lam tan 50 % concession siam a ni. Show hi hun hnihah then niin, First Show chu 11:00 AM - 01:00 PM-ah neih a ni a, Second Show chu 01:30 PM - 03:30 PM-ah neih a ni.

Mizo nun dan chi hrang hrang, heng - Live Demonstration of Mizo Village Life, Traditional Dance, Folk Song & Dance, Indigenous Games, Traditional Cuisines, Traditional Costumes te entir thin a ni a, Mizo hnam thuam chi hrang hrang man chawia hak hawh theih a chhawp chhuah thin a ni bawk.

Living Museum hi Art & Culture Department bultumin Falkawn khuaa NGO hrang hrang – YMA, MUP leh MHIP te nen thawhhona tha tak neia kal pui a ni. Living Museum hi India rama buatsaih hmasa ber leh nei hmasa state kan ni a. Ministry of Tribal Affairs, Govt., of India chuan Living Museum tha taka Mizoram State in an buatsaih hi a tha a ti em em a, India rama State leh UT dang zawng zawngte hnenah Living Museum buatsaih tur leh Living Museum an neih theihna tura ruahmanna siam ve turin a hriattirna a chhuah nghe nghe a ni.