3384/2024-2025
2024 Pawltlak thla ni 5: Tun hnaiah Krismas leh kum thar vuakveta veng/kawn chei leh Krismas bazar siam loh chungchangah thu chiang tawk lo leh sawi fiah zui ngai hret a awm niin Lunglei Municipal Council (LMC) chuan hriain, vawiin khan a hnuaia thuziak ang hian mipuite'n thudik leh nihna tak an hriat theih nan thuchhuah a siam a ni:
"Special Board of Councillors (BoC), Lunglei Municipal Council Dt. 03.12.2024 dar 11:00 AM-a ṭhu khawm chuan Krismas leh kumthar vuakveta kawn/kawtthler chei ṭha vengte, LMC anga lawmman siamsak ve a ṭha em tih a rel a. Ngun taka ngaihtuah a nih hnuah kuminah chuan a hun te a tepter tawh avang leh veng tam zawkah kawn chei mumal taka kalpui a nih rih bawk loh avangin LMC anga lawmman te siama hma lak chu tih rih loh ni se, nakkum 2025 atan zawk ruahmanna hi siam a, kawn/kawtthler chei ṭha vengte lawmman inpek ve ngei ni tawh se tiin a rel a ni. Hei hian mimal, pawl leh veng ṭhahnem ngaite'n mahni sensoa lo chei an lo awm a nih paw'n LMC chuan ṭha a tiin, lawmawm a ti em em zawk a ni.
"Tin, kumin 2024 bik atan Krismas bazar siam loh zawk ni se tih pawh Dt. 23.10.2024-ah department hrang hrangte leh concerned Local Council/Association te nen inrawnin kumin atan chuan faina kawnga inelna LMC area chhungah beihpui thlak mek a nih avangin kan hunpui, thianghlim leh hun hahdam zawka kan lo hmuah te pawh a ṭha e tiin a rel a. Dt. 03.12.2024 Dar 11:00AM-a Special Board of Councillors ṭhu khawm chuan ennawn lehin, kumin bik atan chuan Krismas bazar siam loh ni se tia thu awm tawh chu a pawmpui a ni.
"Chanchin thar leh social media-ah te thu inhlan leh dawnsawn sual palh avanga thu dik lo leng vel awm hi LMC chuan pawi a ti tak zet a, thu dik leh nihna zawk hre fiah turin mipuite a ngen a ni."
