Vawiin chawhma khan Kulikawn YMA Hall-ah ni 2 chhung awh tur, Aizawl khawpui chhunga Bank  hrang hrang 29 intelkhawmin a buatsaih Loan pekchhuah runpui chu Rural Development Minister Pu Lalruatkima chuan Loan mamawhtute dawr theih atan a hawng a. Vawiin leh naktuk thleng Public Sector Banks- Customer Outreach initiatives, 2019 hi Aizawlah bik chuan  neih a ni dawn a; Lungleiah October 4 leh 5 hian neih a ni leh dawn a ni.

Grahak Mela Phase-I(Loan Mela) hawngtu Pu Lalruatkima chuan hmasawnna atan Loan tangkaina te sawiin ruahmanna fel tak nei chunga Loan puk chu eizawnna kawnga dinchhuahna a ni a ti a. Loan la zingah dinchhuahpui tam tak an awm thu leh loan puka mawhphurhna hria an tam laiin loan rul tha lo an awm thin chu inenfiah ngai lai a ni tih a sawi a. Loan rul tha lo te avangin Bank ten loan pek chhuah kawngah harsatna an nei thin a. Hei hian  mi tam tak loan hmanga bul tan tum te a dang bet thin a ni a ti.

Tun tuma Bank intel khawm ten awlsam zawka customer te puala Loan Mela an buatsaih chu thil lawmawm tak a ni a ti a. Bank ten kalphung zawm tur an neih avanga Loan buaipui chhunga a rei thin tih a sawi a.  Bank dawr tura hun neih te a harsat thin avangin Bank rual intelkhawm ten mipui te tana awlsamna ngaihtuaha, a huhova loan pekchhuah runpui an buahsaih chu tangkai taka chhawr ngei turin mipuite duhdakna a hlan a ni. Hmasawnna leh Bank chu thil inlaichin tlat a nih thu a sawi a. Mizo mipuite chu bank hmanthiam kawngah tan kan lak a ngai hle ni a ti. Central atanga khua leh tui te hamthatna tam zawk pawh Direct Beneficiary Transfer(DBT) hmanga Beneficiary account-ah thunluh thin a nih thu sawiin Gas lak, Ni 100 inhlawhna leh thil danga sawrkarin benficiary te a tihtlawm sakna sum te pawh  Bank account-ah vek a luh tawh avangin account neih pawh a pawimawh tawh takzet a ni a ti.

Vawiina Loan Mela hawnnah hian Khuallian RD Minister Pu Lalruakima chuan Loan Sanction Letter peihfel sa - SBI atangin 160, Mizoram Rural Bank atangin 10, Bank of Baroda atangin 3, Canara Bank atangin 3, Bandhan, UCO, Federal Bank leh Central Bank atangin pakhat theuh Customer te hnenah a semchhuak nghal a. Hawnna hun buatsaih zawh hian Loan Mela hi kalpui tan a ni. Grahak Mela Phase-I(Loan Mela) chhung hian Kulikawn YMA Hall chhawng hnuaiah Bank 29 a dawhkan an hung a. Heng dawhkan tinah hian Bank hnathawktute an duty vek a. Hengah te hian  Loan chi hrang hrang - Home Loan, Car/Auto Loan, Agriculture Loan, Education Loan, MSME Loan leh Persnal  Loan te mahni document leh bank document pawimawh te kengin ngaihven theih a ni.